സുരേഷ് ഗോപി ഡബിള്‍ റോളിലോ ?

ശരിക്കും സുരേഷ് ഗോപി ആരാണ്…? കേന്ദ്രമന്ത്രിയോ ? രാഷ്ട്രീയ നേതാവോ…? അല്ല സിനിമാ താരം മാത്രമോ ? ബി ജെ പി യുടെ പ്രമുഖ നേതാക്കള്‍ പലരും പറയുന്നത് സുരേഷ് ഗോപി സിനിമാ താരമാണെന്നാണ്. കേന്ദ്രമന്ത്രി സഭയില്‍ സഹമന്ത്രിയും തൃശ്ശൂരിലെ എം പിയുമാണ് സുരേഷ് ഗോപി. പക്ഷേ, ചില നേരങ്ങളില്‍ അദ്ദേഹം വെറും സിനിമാക്കാരനായി മാറും.

അപ്പോള്‍ അദ്ദേഹത്തോട് പൊതുവായ വിഷയങ്ങളൊന്നും ചോദിക്കരുത്. വീട്ടില്‍ നിന്നും വരുമ്പോള്‍ വീട്ടുകാരനാവും. ക്ഷേത്രത്തില്‍ നിന്നും വരികയാണെങ്കില്‍ ഒരു ഭക്തനായി കാണണം. ഗസ്റ്റ് ഹൗസില്‍ നിന്നാണ്  വരുന്നതെങ്കില്‍ , (ഗസ്റ്റ് ഹൗസിലേക്കാണ് പോകുന്നതെങ്കിലും ) അദ്ദേഹത്തെ മന്ത്രിയായി പരിഗണിക്കണം. പൂരപറമ്പിലാണെങ്കില്‍ പൂരപ്രമാണിയായിരിക്കണം. ഇതൊക്കെയാണ് ബി ജെ പി നേതാവും സിനിമയില്‍ സൂപ്പര്‍ സ്റ്റാറുമായ കേന്ദ്രമന്ത്രിയുമൊക്കെയായ സുരേഷ് ഗോപിയുടെ നിലപാട്.

സുരേഷ് ഗോപി മത്സരിക്കാനെത്തിയപ്പോള്‍ അദ്ദേഹം സിനിമാ താരമെന്നായിരുന്നില്ല ബി ജെ പി പറഞ്ഞിരുന്നത്. സാമൂഹ്യ പ്രതിബന്ധതയുള്ളൊരു പൊതുപ്രവര്‍ത്തകനെന്നായിരുന്നു. സുരേഷ് ഗോപി എന്തെങ്കിലും വിവാദങ്ങളില്‍ അകപ്പെട്ടാലോ, അപ്പോവരും ബി ജെ പി നേതാക്കള്‍, അദ്ദേഹം 80 ശതമാനം സിനിമാതാരമാണെന്നും 20 ശതമാനം മാത്രമേ പാര്‍ട്ടി പ്രവര്‍ത്തകനുള്ളൂവെന്നും പറയും.

സിനിമയിലാണെങ്കില്‍ കാക്കിയാണ് വേഷമെങ്കില്‍ ഭരത്ചന്ദ്രനായിരിക്കും. നേരത്തെ കളിയാട്ടം എന്ന ജയരാജ് ചിത്രത്തില്‍ പെരുവണ്ണാന്റെ വേഷം അവതരിപ്പിച്ച് ദേശീയ അവാര്‍ഡ് നേടിയിരുന്ന വേളയില്‍ തനിക്ക് കാവില്‍ തെയ്യം കെട്ടിയാടണമെന്നായിരുന്നു അദ്ദേഹത്തിന്റെ ആവശ്യം. ആചാരപരമായ കാര്യങ്ങളാണെന്നും അതിന് തടസമുണ്ടെന്നും ഭാരവാഹികള്‍ പറഞ്ഞെങ്കിലും തനിക്ക് അതിനൊരു അവസരം വേണമെന്ന ആവശ്യം അദ്ദേഹം ആവര്‍ത്തിച്ചുകൊണ്ടേയിരുന്നു.

കാലം മാറിയതോടെ അതില്‍ നിന്നും മുക്തനായി. രാഷ്ട്രീയക്കാരനായി തൃശ്ശൂരില്‍ എത്തിയ സുരേഷ് ഗോപി തൃശ്ശൂര്‍ എടുക്കുമെന്നും പ്രഖ്യാപിച്ചു. എനിക്ക് വേണം എന്നു പറഞ്ഞു. രണ്ടാം തവണ തൃശ്ശൂരിലെ വോട്ടര്‍മാര്‍ സുരേഷ് ഗോപിക്ക് തൃശ്ശൂര്‍ നല്‍കി. കേരളത്തില്‍ നിന്നും വിജയിച്ച് ഡല്‍ഹിയില്‍ എത്തിയ സുരേഷ് ഗോപി കേന്ദ്ര ക്യാബിനറ്റ് മന്ത്രി സ്ഥാനം വേണം എന്നു പറഞ്ഞു.

ലഭിച്ചതോ കേന്ദ്രസഹമന്ത്രി സ്ഥാനവും. അങ്ങനെയെങ്കില്‍ മന്ത്രിസ്ഥാനം വേണ്ടെന്നായി സൂപ്പര്‍താരത്തിന്റെ നിലപാട്. രാഷ്ട്രീയ രംഗത്ത് അത്രയൊന്നും പരിചയമില്ലാത്ത സുരേഷ് ഗോപി അതിലേറെ പ്രതീക്ഷിച്ചു. പ്രധാനമന്ത്രിയും ആഭ്യരമന്ത്രിസ്ഥാനവും കഴിഞ്ഞുള്ള ഒരു റോളില്‍ കാസ്റ്റ് ചെയ്യപ്പെടുമെന്നായിരുന്നു സുരേഷ് ഗോപി പ്രതീക്ഷിച്ചിരുന്നത്.
സിനിമയല്ലല്ലോ അതിനാല്‍ നായക വേഷത്തിലേക്ക് സുരേഷ് ഗോപി എത്തിയില്ല. അതിന്റെ മാനസിക സംഘര്‍ഷത്തിലാണ് സുരേഷ് ഗോപിയത്രേ… പാവം…

സിനിമയാണ് എന്‍റെ പാഷനെന്നും മന്ത്രി സ്ഥാനത്തുനിന്നും ഒഴിവാക്കപ്പെടുകയാണെങ്കില്‍ വലിയ സന്തോഷമെന്നുമുള്ള സുരേഷ് ഗോപിയുടെ പ്രതികരണം ബി ജെ പിയെ ഞെട്ടിച്ചു. മന്ത്രിസ്ഥാനത്തുനിന്നും ഒഴിവാക്കപ്പെടുകയാണെങ്കില്‍ അതില്‍ സന്തോഷിക്കുകയേ ചെയ്യുവെന്നും അമിത് ഷായോട് സിനിമയില്‍ അഭിനയിക്കാന്‍ അവസരം ചോദിച്ചിരിക്കയാണെന്നുമായിരുന്നു ഗോപിയേട്ടന്റെ വെളിപ്പെടുത്തല്‍.

എല്ലാം അഭിനയം മാത്രമായ സൂപ്പര്‍ താരത്തിന് എന്ത് ജനപ്രതിനിധി…?  എന്ത് കേന്ദ്രസഹമന്ത്രി… ? ഹേമാ കമ്മിറ്റി റിപ്പോര്‍ട്ടില്‍ ആകെ വലഞ്ഞ മലയാള സിനിമയ്ക്ക് വലിയ ആഘാതമാണ് ഉണ്ടായിക്കൊണ്ടിരിക്കുന്നത്. അമ്മയിലെ പല ഭാരവാഹികളും ലൈംഗികാരോപണ കേസില്‍ പെട്ട് നട്ടം തിരിയുകയാണ്. ഇതിനിടയിലാണ് സുരേഷ് ഗോപിയുടെ ഷോ തൃശ്ശൂരില്‍ അരങ്ങേറിയത്. പത്രക്കാരുണ്ടാക്കിയതാണ് ഹേമ കമ്മിറ്റി റിപ്പോര്‍ട്ടെന്നു തോന്നും സുരേഷ് ഗോപിയുടെ പ്രതികരണം കേട്ടാല്‍.

ബി ജെ പിയുടെ നേതാവ് എന്ന നിലയില്‍ എം മുകേഷ് എം എല്‍ എയ്‌ക്കെതിരെയുള്ള ലൈംഗികാരോപണത്തില്‍ പ്രതികരണം ആരാഞ്ഞ മാധ്യമ പ്രവര്‍ത്തകരെ ഗോപിയേട്ടന്‍ ആദ്യം ശകാരിച്ചു. രണ്ടാം ഘട്ടത്തില്‍ പ്രതികരണം ആരാഞ്ഞ മാധ്യമ സംഘത്തെ പിടിച്ചു തള്ളി. ഓരോ സമയങ്ങളില്‍ എന്ത് ചോദ്യം ചോദിക്കണമെന്ന നിയമം ലംഘിച്ചതിനാണ് ഈ ‘ തള്ളല്‍ ‘

ബി ജെ പി നേതാക്കള്‍ ന്യായീകരണത്തിനായി രംഗത്തുണ്ടെങ്കിലും ബി ജെ പിയുടെ നിലപാട് പറയേണ്ടത് സുരേഷ് ഗോപിയല്ലെന്ന് കെ സുരേന്ദ്രന്‍ പറഞ്ഞിട്ടുണ്ട്. സുരേഷ് ഗോപിയെങ്ങിനെ പ്രതികരിക്കുമെന്ന് എല്ലാവര്‍ക്കും അറിയാമല്ലോ എന്നാണ് ബി ജെ പി നേതാവ് ബി ഗോപാലകൃഷ്ണന്‍ ചോദിക്കുന്നത്.

നമുക്കറിഞ്ഞിട്ട് കാര്യമില്ല സാര്‍… അദ്ദേഹത്തെ അറിയാതെ പോയത് തൃശ്ശൂരിലെ നിഷ്‌ക്കളങ്കരായ വോട്ടര്‍മാരാണ്… അവരിതൊക്കെ എങ്ങനെ സഹിക്കും സാര്‍… എന്തായാലും സുരേഷ് ഗോപി മറ്റൊരു പോര്‍മുഖം തീര്‍ത്തിരിക്കുകയാണ്. ഇനി മാധ്യമങ്ങള്‍ ഗോപ്യേട്ടന്റെ പിന്നാലെ പോയ്‌ക്കോളൂം…എന്താലേ… സഹപ്രവര്‍ത്തകരോടുള്ള കരുതല്‍…ഹോ ഈ സ്‌നേഹം സത്യത്തിലാരും തിരിച്ചറിഞ്ഞില്ലല്ലോ…