മഡ്രിഡ്∙ രാജ്യാന്തര ട്വന്റി20യിൽ കൂടുതൽ തുടർ വിജയങ്ങളെന്ന റെക്കോർഡ് ഇനി സ്പെയിനിന്റെ പേരിൽ! ട്വന്റി20 ലോകകപ്പ് യൂറോപ്പ് സബ് റീജിയനൽ ക്വാളിഫയർ സിയിൽ, ഗ്രീസിനെതിരെ ഏഴു വിക്കറ്റ് വിജയം നേടിയതോടെയാണ് സ്പെയിൻ റെക്കോർഡ് ബുക്കിൽ ഇടം നേടിയത്.
സ്പെയിന്റെ തുടർച്ചയായി 14–ാം വിജയമാണിത്. പിന്നിലാക്കിയത് 2022ൽ തുടർച്ചയായി 13 വിജയങ്ങളുമായി മലേഷ്യ സ്ഥാപിച്ച റെക്കോർഡ്.ഇതോടെ, കരുത്തരായ ഇന്ത്യ ഉൾപ്പെടെയുള്ള ടീമുകൾ ഇവർക്കു പിന്നിലായി. 13 വീതം തുടർ വിജയങ്ങളുമായി മലേഷ്യയും ബെർമുഡയുമാണ് രണ്ടാം സ്ഥാനത്ത്. 12 മത്സരങ്ങളിൽ തുടർച്ചയായി വിജയിച്ച ഇന്ത്യ, അഫ്ഗാനിസ്ഥാൻ, റുമാനിയ എന്നീ ടീമുകൾ സംയുക്തമായി മൂന്നാം സ്ഥാനത്തുണ്ട്.
സ്പെയിനിന്റെ അടുത്ത ലക്ഷ്യം വനിതാ ക്രിക്കറ്റിൽ തുടർച്ചയായി 17 വിജയങ്ങൾ കുറിച്ച് തായ്‌ലൻഡ് വനിതാ ടീം സ്ഥാപിച്ച റെക്കോർഡ് തകർക്കുകയാണ്.
