ദുബായ്: ഐസിസി ടെസ്റ്റ് ബൗളര്‍മാരുടെ റാങ്കിംഗില്‍ ഒന്നാം സ്ഥാനത്തെത്തി ജസ്പ്രിത് ബുമ്ര. ബംഗ്ലാദേശിനെതിരെ ടെസ്റ്റ് പരമ്പരയിലെ പ്രകടനമാണ് ബുമ്രയെ നേട്ടത്തിലേക്കെത്തിച്ചത്. മത്സരങ്ങളില്‍ 11 വിക്കറ്റുകളാണ് ബുമ്ര വീഴ്ത്തിയത്. ഇന്ത്യന്‍ സ്പിന്നര്‍ ആര്‍ അശ്വിനെ പിന്തള്ളിയാണ് ബുമ്ര ഒന്നാമതെത്തുന്നത്. അശ്വിനും 11 വിക്കറ്റുകള്‍ സ്വന്തമാക്കിയിരുന്നു. റാങ്കിംഗില്‍ രണ്ടാം സ്ഥാനത്താണ് അശ്വിന്‍.
അതേസമയം, ബാറ്റര്‍മാരുടെ റാങ്കിംഗില്‍ യശസ്വി ജയ്സ്വാള്‍ മൂന്നാം സ്ഥാനത്തെത്തി. രണ്ട് സ്ഥാനങ്ങളാണ് ജയ്സ്വാള്‍ മെച്ചപ്പെടുത്തിയത്. രണ്ട് ടെസ്റ്റില്‍ നിന്ന് 189 റണ്‍സാണ് ജയ്സ്വാളിന്റെ സമ്പാദ്യം. ആറ് സ്ഥാനങ്ങള്‍ മെച്ചപ്പെടുത്തിയ വിരാട് കോലി ആറാമതായത്. ഇംഗ്ലണ്ട് മുന്‍ ക്യാപ്റ്റന്‍ ജോ റൂട്ട് ഒന്നാം സ്ഥാനം നിലനിര്‍ത്തി. ന്യൂസിലന്‍ഡ് താരം കെയ്ന്‍ വില്യംസണ്‍ രണ്ടാം സ്ഥാനം നിലനിര്‍ത്തി.
