പാലക്കാട്: എലുപ്പുള്ളിയില്‍ കിണറ്റില്‍ അകപ്പെട്ട കാട്ടുപന്നികളെ വെടിവെച്ച് കൊന്നു. കാക്കത്തോട് സ്വദേശി ബാബുരാജിന്റെ വീട്ടിലെ കിണറ്റിലാണ് കാട്ടുപന്നികള്‍ അകപ്പെട്ടത്. ഇന്ന് പുലര്‍ച്ചെയാണ് കൃഷിസ്ഥലം നനക്കാന്‍ വെള്ളമെടുക്കാന്‍ ഉപയോഗിക്കുന്ന കിണറ്റില്‍ കാട്ടുപന്നിക്കൂട്ടം വീണത്.
വിവരം അറിഞ്ഞ ഉടനെ ഉദ്യോഗസ്ഥര്‍ സംഭവ സ്ഥലത്തെത്തി കാട്ടുപന്നികളെ കിണറ്റില്‍ നിന്നും രക്ഷപ്പെടുത്താന്‍ ശ്രമിച്ചിരുന്നു. എന്നാല്‍ രക്ഷപ്പെടുത്താന്‍ സാധിച്ചില്ല. ഇതോടെയാണ് വെടിവെച്ച് കൊന്നത്. പ്രത്യേക ഷൂട്ടര്‍മാരാണ് കാട്ടുപന്നികളെ വെടിവെച്ചത്. കഴിഞ്ഞ കുറച്ചുനാളുകളായി പ്രദേശത്ത് കാട്ടുപന്നി ശല്യം ഉണ്ടായിരുന്നു.
