ദോഹ: അൽ ബെയ്ത് സ്റ്റേഡിയത്തിൽ ഇന്ന് നടക്കുന്ന എഎഫ്സി ചാംപ്യൻസ് ലീഗ് എലൈറ്റ് മത്സരത്തിൽ ബൂട്ടണിയാൻ ക്രിസ്റ്റ്യാനോ റൊണാൾഡോ. സൗദി അറേബ്യയുടെ അൽ നാസർ ക്ലബ് താരമാണ് റൊണാൾഡോ. ഖത്തറിന്റെ അൽ ഗരാഫയ്ക്കെതിരെയുള്ള പോരാട്ടത്തിനായാണ് ഇന്ന് അദ്ദേഹം കളിക്കളത്തിൽ ഇറങ്ങുന്നത്. മത്സരം ഇന്ന് വൈകിട്ട് പ്രാദേശിക സമയം 7.00 ന് നടക്കും.
ഇന്നലെയാണ് റൊണാൾഡോയും സംഘവും മത്സരത്തിനായി ദോഹയിലെത്തിയത്. ആരാധകർ ആവേശത്തിലാണ്. ഇതിഹാസ താരം റൊണാൾഡോയെ വീണ്ടും അടുത്തു കാണാൻ കഴിയുന്നതിന്റെ സന്തോഷത്തിൽ ആണ് ഖത്തർ.
ചാംപ്യൻസ് ലീഗിൽ 4 മത്സരങ്ങൾ പിന്നിട്ടപ്പോൾ സൗദിയുടെ അൽ നാസർ 10 പോയിൻറുമായി 3–ാം സ്ഥാനത്തും 6 പോയിന്റുകളുമായി ഖത്തറിന്റെ അൽ ഗരാഫ 6–ാം സ്ഥാനത്തുമാണ്.
