ഇസ്ലാമാബാദ്: ഇന്ത്യയുമായുള്ള സംഘര്‍ഷം ശക്തമാകുന്നതിനിടെ പാകിസ്ഥാന്‍ തലസ്ഥാനമായ ഇസ്ലാമാബാദില്‍ പെട്രോള്‍ പമ്പുകള്‍ അടച്ചു. 48 മണിക്കൂര്‍ നേരത്തേക്ക് പമ്പുകള്‍ അടച്ചിടാന്‍ ഇസ്ലാമാബാദ് ക്യാപിറ്റല്‍ ടെറിട്ടറി ഡിസ്ട്രിക്റ്റ് മജിസ്‌ട്രേറ്റാണ് ഉത്തരവിട്ടത്. ഈ നീക്കത്തിന് പിന്നിലെ കാരണം ഉത്തരവില്‍ വ്യക്തമല്ലെങ്കിലും പാകിസതാന്‍ കടുത്ത ഇന്ധനക്ഷാമത്തിലേക്ക് കടക്കുന്നുവെന്നാണ് വിവിധ റിപ്പോര്‍ട്ടുകള്‍ പറയുന്നത്. പാകിസ്താനില്‍ ഭക്ഷ്യക്ഷാമവും ഉണ്ടെന്നാണ് സൂചനകള്‍.
ഡല്‍ഹിയിലേക്ക് പാകിസ്താന്‍ അയച്ച മിസൈല്‍ ഹരിയാനയിലെ സിര്‍സയില്‍ വച്ച് ഇന്ത്യ തകര്‍ത്തിരുന്നു. പിന്നാലെ പാകിസ്തനിലെ തന്ത്രപ്രധാന വ്യോമതാവളങ്ങളായ റാവല്‍പിണ്ടിയിലുള്ള നുര്‍ ഖാന്‍, ചക്‌വാലിലെ മുറീദ്, ഝാങ്ങിലെ റഫീഖീ എന്നിവിടങ്ങളില്‍ ഇന്ത്യ കനത്ത പ്രഹരവുമേല്‍പ്പിച്ചു. ഇക്കാര്യം പാകിസ്താന്‍ സ്ഥീരീകരിച്ചിട്ടുണ്ട്. പാക്ക് തലസ്ഥാനമായ ഇസ്ലാമാബാദില്‍ നിന്ന് 20 കിലോമീറ്റര്‍ മാത്രം അകലെയാണ് നുര്‍ ഖാന്‍. ഇവിടെ ഇന്ത്യ കനത്ത ആക്രമണം നടത്തിയതിനു പിന്നാലെയാണ് പെട്രോള്‍ പമ്പുകള്‍ അടച്ചിടാനുള്ള നിര്‍ദേശം വന്നത്്.
ഇന്ത്യയുമായുള്ള യുദ്ധം പാകിസ്താന്റെ സമ്പദ്‌വ്യവസ്ഥയെ ബാധിക്കുമെന്ന് അമേരിക്കന്‍ റേറ്റിങ് ഏജന്‍സിയായ മൂഡീസ് അടുത്തിടെ ചൂണ്ടിക്കാട്ടിയിയിരുന്നു. ഈ സാഹചര്യത്തിലും, രാജ്യത്തെ രാഷ്ട്രീയ, സൈനിക മേഖലകളില്‍ നിന്നുള്ള സമ്മര്‍ദത്തിനടിപ്പെട്ടാണ് ഇന്ത്യയ്‌ക്കെതിരെ ആക്രമണത്തിന് പാകിസ്താന്‍ സാഹസം കാട്ടുന്നതെന്നാണ് വിലയിരുത്തല്‍.
