മുംബൈ: നടന്‍ സെയ്ഫ് അലി ഖാനെ ആക്രമിച്ച കേസില്‍ അറസ്റ്റ് നിയമവിരുദ്ധമായി പ്രഖ്യാപിക്കണമെന്ന് കേസിലെ പ്രതിയായ ബംഗ്ലദേശ് സ്വദേശി മുഹമ്മദ് ഷെരിഫുല്‍ ഇസ്ലാം.തന്റെ അറസ്റ്റ് നിയമവിരുദ്ധമായി പ്രഖ്യാപിക്കണമെന്നും ജാമ്യം അനുവദിക്കണമെന്നും അഭ്യര്‍ഥിച്ച് ബംഗ്ലദേശ് സ്വദേശി മുഹമ്മദ് ഷെരിഫുല്‍ ഇസ്ലാം (30) ബാന്ദ്ര മജിസ്‌ട്രേട്ട് കോടതിയെ സമീപിച്ചു. നേരത്തെ ഇതേ ആവശ്യം ഉന്നയിച്ച് സെഷന്‍സ് കോടതിയില്‍ നല്‍കിയ അപേക്ഷ പിന്‍വലിച്ച ശേഷമാണ് പ്രതി മജിസ്‌ട്രേട്ട് കോടതിയെ സമീപിച്ചത്.
പൊലീസിനോടു നിലപാട് അറിയിക്കാന്‍ നിര്‍ദേശിച്ച കോടതി കേസ് 13ലേക്കു മാറ്റിവച്ചു. മുംബൈയിലെ ആര്‍തര്‍ റോഡ് ജയിലിലാണു ഷെരിഫുലിനെ പാര്‍പ്പിച്ചിരിക്കുന്നത്. തനിക്കെതിരെയുള്ള കേസ് കെട്ടിച്ചമച്ചതാണെന്നാണ് പ്രതി അവകാശപ്പെടുന്നത്.
ജനുവരി 16നു രാത്രിയാണ്, ബാന്ദ്രയിലെ താമസസമുച്ചയത്തിലെ പന്ത്രണ്ടാം നിലയിലുള്ള സെയ്ഫ് അലി ഖാന്റെ വസതിയില്‍ ഷെരിഫുല്‍ നുഴഞ്ഞുകയറിയത്. പിന്നീട്, മോഷണം തടയാന്‍ ശ്രമിച്ച നടനെ പ്രതി കത്തികൊണ്ട് ആക്രമിച്ചെന്നാണു കേസ്. 6 കുത്തേറ്റ സെയ്ഫ് അലി ഖാനെ അടിയന്തര ശസ്ത്രക്രിയയ്ക്കു വിധേയമാക്കിയിരുന്നു. 2 ദിവസത്തിനു ശേഷമാണു പ്രതി പിടിയിലായത്.
