തിരുവനന്തപുരം: സര്‍ക്കാര്‍ ഹയര്‍ സെക്കന്‍ഡറി സ്‌കൂളുകളിലെ 207 അധ്യാപകരെ സ്ഥലംമാറ്റിക്കൊണ്ടുള്ള പൊതുവിദ്യാഭ്യാസ ഡയറക്ടറുടെ ഇടക്കാല ഉത്തരവ് റദ്ദാക്കിയ കേരള അഡ്മിനിസ്‌ട്രേറ്റീവ് ട്രൈബ്യൂണല്‍ (KAT) വിധിക്കെതിരെ സര്‍ക്കാര്‍ ഹൈക്കോടതിയില്‍ അപ്പീല്‍ നല്‍കും. ഇതിനായി അഡ്വക്കറ്റ് ജനറലിനെ ചുമതലപ്പെടുത്തിയെന്നു വ്യക്തമാക്കിയ മന്ത്രി വി.ശിവന്‍കുട്ടി, കെഎടി ഉത്തരവിനെ വിമര്‍ശിക്കുകയും ചെയ്തു.
‘തസ്തിക നിര്‍ണയവുമായി ബന്ധപ്പെട്ടു സര്‍ക്കാര്‍ സുതാര്യമായ മാനദണ്ഡങ്ങള്‍ പാലിച്ച് നടപ്പാക്കിയ സ്ഥലംമാറ്റമാണു ട്രൈബ്യൂണല്‍ റദ്ദാക്കിയത്. സ്ഥലംമാറ്റം ജൂണ്‍ ഒന്നിനു മുന്‍പ് പൂര്‍ത്തിയാക്കണോ വേണ്ടയോ എന്നൊക്കെ തീരുമാനിക്കേണ്ടതു സര്‍ക്കാരാണ്. അത് ഓഗസ്റ്റില്‍ പൂര്‍ത്തിയാക്കിയാല്‍ മതിയെന്നൊക്കെ പറയുന്നത് ചട്ടപ്രകാരമുള്ള കാര്യമല്ലെന്നാണ് മന്ത്രി പറയുന്നത്.
ഹയര്‍ സെക്കന്‍ഡറി അധ്യാപകരുടെ പൊതുസ്ഥലംമാറ്റത്തിനുള്ള താല്‍ക്കാലിക പട്ടിക 19നകം പ്രസിദ്ധീകരിക്കുമെന്നും അന്തിമ പട്ടിക 26ന് പ്രഖ്യാപിക്കുമെന്നും മന്ത്രി അറിയിച്ചു. 8204 അധ്യാപകരാണ് സ്ഥലംമാറ്റത്തിനായി ഓണ്‍ലൈനായി അപേക്ഷിച്ചത്.
