കണ്ണൂര്‍: മാടായി കോളേജ് നിയമന വിഷയത്തില്‍ എം കെ രാഘവന്‍ എം പിയുടെ നിലപാടില്‍ കണ്ണൂര്‍ ഡിസിസിയില്‍ കടുത്ത അതൃപ്തി. കോഴ വാങ്ങി ഡിവൈഎഫ്‌ഐ പ്രവര്‍ത്തകനെ നിയമിച്ചെന്നാണ് കോണ്‍ഗ്രസ് പ്രവര്‍ത്തകരുടെ ആരോപണം. പ്രവര്‍ത്തകരുടെ വികാരത്തെ കണക്കിലെടുക്കാതെയാണ് എം കെ രാഘവന്‍ എംപി നിയമനം നടത്തിയത് എന്നും ഡിസിസി സുധാകരനെ അറിയിച്ചു. സംഭവത്തില്‍ എം കെ രാഘവന്‍ എംപിയുടെ കോലം കത്തിച്ചും നേതാക്കള്‍ പ്രതിഷേധിച്ചിരുന്നു.
എംപിയെ വഴിയില്‍ തടഞ്ഞ സംഭവത്തില്‍ പ്രാദേശിക നേതാക്കള്‍ക്കെതിരെ നടപടിയെടുത്തതില്‍ പ്രതിഷേധിച്ച് കോണ്‍ഗ്രസില്‍ കൂട്ടരാജി ഉണ്ടായിരുന്നു കുഞ്ഞിമംഗലം മണ്ഡലം കമ്മിറ്റി ഒന്നടങ്കമാണ് രാജിവെച്ചത്. കഴിഞ്ഞ ദിവസം കണ്ണൂര്‍ കോണ്‍ഗ്രസില്‍ വീണ്ടും ഒരു നേതാവ് കൂടി രാജിവെച്ചു. വെള്ളൂര്‍ മണ്ഡലം പ്രസിഡന്റ് കെ.ടി ഹരീഷാണ് രാജിവെച്ചത്.
കോണ്‍ഗ്രസ് ഭരിക്കുന്ന മാടായി കോളേജില്‍ കോഴ വാങ്ങി സിപിഐഎം ബന്ധമുള്ള അധ്യാപകനെ നിയമിക്കാന്‍ ശ്രമം നടത്തിയെന്ന് ആരോപിച്ചായിരുന്നു എം കെ രാഘവന്‍ എംപിക്കെതിരെ കോണ്‍ഗ്രസ് പ്രവര്‍ത്തകര്‍ പ്രതിഷേധിച്ചത്. ഇതിന് പിന്നാലെ കോണ്‍ഗ്രസ് നേതാക്കള്‍ക്കെതിരെ ഡിസിസി അച്ചടക്ക നടപടി സ്വീകരിച്ചു.
നാല് നേതാക്കളെ ഡിസിസി സസ്‌പെന്‍ഡ് ചെയ്തു. എന്നാല്‍ ഭരണസമിതി ചെയര്‍മാന്‍ കൂടിയായ എം പിക്കെതിരെ നടപടിയെടുക്കാതെ അംഗങ്ങളെ സസ്‌പെന്‍ഡ് ചെയ്യത് നടപടിയില്‍ പാര്‍ട്ടിയില്‍ നിന്ന് തന്നെ വിമര്‍ശനം ഉയരുകയാണ്.
