ചെന്നൈ: ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്ന് ഐഎസ്ആർഒ നൂറാമത്തെ റോക്കറ്റ് വിജയകരമായി വിക്ഷേപിച്ചു. ബുധനാഴ്ച രാവിലെ 6.23-ന് പറന്നുയർന്ന ജിഎസ്എൽവി-എഫ് 15 റോക്കറ്റ് ഗതിനിർണയ ഉപകരണം എൻവിഎസ്-02 സാറ്റലൈറ്റ് ഭ്രമണപഥത്തിൽ എത്തിക്കാൻ ഉദ്ദേശിച്ചാണ് വിക്ഷേപിച്ചത്.
ഇന്ത്യയിൽ ഗതിനിർണയവും ദിശനിർണയവും (നാവിഗേഷൻ) ആവശ്യങ്ങൾക്കായി വികസിപ്പിച്ചുവരുന്ന നാവിക് സംവിധാനത്തിന്റെ ഭാഗമായാണ് 2,250 കിലോഗ്രാം ഭാരമുള്ള ഉപഗ്രഹം വിക്ഷേപിക്കുന്നത്. ഈ ശ്രേണിയിലെ ആദ്യ ഉപഗ്രഹം എൻവിഎസ്-01 2023 മെയ് 29-നാണ് വിക്ഷേപിച്ചത്.
