ശബരിമലയില്‍ ഭക്തര്‍ക്ക് വെര്‍ച്വല്‍ ക്യൂ വഴി അല്ലാതെ 10000 പേര്‍ക്ക് ദര്‍ശനം നടത്താം. മുഖ്യമന്ത്രിയുടെ അധ്യക്ഷതയില്‍ ചേര്‍ന്ന അവലോകന യോഗത്തിലാണ് പുതിയ തീരുമാനം കൈക്കൊണ്ടിരിക്കുന്നത്. എരുമേലി, പമ്പ, വണ്ടിപ്പെരിയാര്‍ ഇടത്താവളം എന്നിവിടങ്ങളില്‍ സ്പോട്ട് ബുക്കിംഗ് സൗകര്യം ഉണ്ടായിരിക്കും. മൂന്നിടങ്ങളിലായി 13 കൗണ്ടറുകളാണ് ഉണ്ടാവുക. പമ്പയില്‍ അഞ്ചും എരുമേലിയിലും വണ്ടിപ്പെരിയാറും മൂന്നുവീതം കൗണ്ടറുകള്‍ ഉണ്ടായിരിക്കും.
എന്നാല്‍ സ്പോട്ട് ബുക്കിംഗ് വഴി ലഭിക്കുന്ന പാസില്‍ ബാര്‍കോഡ് സംവിധാനം ഉണ്ടാകും. ഇതിനായി തീര്‍ത്ഥാടകര്‍ തിരിച്ചറിയല്‍ രേഖയും ഫോട്ടോയും കരുതണം. പരിശോധന പോയിന്റുകളില്‍ സ്‌കാന്‍ ചെയ്യുമ്പോള്‍ ഭക്തരുടെ വിവരങ്ങള്‍ ലഭിക്കാനാണ് ഈ സംവിധാനം ഏര്‍പ്പെടുത്തുന്നത്. തീര്‍ത്ഥാടനത്തോടനുബന്ധിച്ച് പമ്പയും പരിസരവും മാലിന്യ മുക്തമാക്കാനും ആരോഗ്യസേവനങ്ങള്‍ ഉറപ്പാക്കാനുമുളള പദ്ധതികളും സര്‍ക്കാര്‍ നടപ്പിലാക്കി വരുകയാണ്.
