മലപ്പുറം: മലപ്പുറത്ത് നിന്ന് കാണാതായ പ്രതിശ്രുത വരന്‍ വിഷ്ണുജിത്തിനെ കണ്ടെത്തി. പൊലീസ് നടത്തിയ അന്വേഷണത്തില്‍ ഊട്ടിയില്‍ നിന്നാണ് യുവാവിനെ കണ്ടെത്തിയിരിക്കുന്നത്. ഫോണ്‍ ഓണായത് അന്വേഷണത്തിന് സഹായകമായെന്നും സംഭവത്തില്‍ കൂടുതല്‍ പ്രതികരണം പിന്നീട് നടത്തുമെന്നും എസ്പി വ്യക്തമാക്കി. ഇന്നലെ രാത്രി കുനൂരില്‍ വച്ച് ഫോണ്‍ ഓണായിരുന്നു. ഈ സൂചനയ്ക്ക് പിന്നാലെ പോയ പൊലീസ് യുവാവിനെ കണ്ടെത്തുകയായിരുന്നു.
കഴിഞ്ഞ നാലാം തീയതിയാണ് മലപ്പുറം പള്ളിപ്പുറം സ്വദേശിയായ വിഷ്ണുജിത്തിനെ കാണാതാകുന്നത്. വിഷ്ണുജിത്തിന്റെ വിവാഹം ഇക്കഴിഞ്ഞ ഞായറാഴ്ച നടക്കേണ്ടതായിരുന്നു. കുറച്ച് പണം കിട്ടാനുണ്ടെന്നും ഉടന്‍ തിരിച്ച് വരാമെന്നും പറഞ്ഞാണ് വിഷ്ണുജിത്ത് നാലാം തീയതി പാലക്കാട്ടേക്ക് പോയത്. എന്നാല്‍ പിന്നീട് ഫോണ്‍ സ്വിച്ച് ഓഫായി. നാലാം തീയതി വിഷ്ണു പാലക്കാട് ബസ്റ്റാന്റില്‍ നിന്നും കോയമ്പത്തൂരിലേക്കുള്ള ബസ് കയറുന്ന സിസിടിവി ദൃശ്യം പുറത്ത് വന്നിരുന്നു. സാമ്പത്തിക പ്രതിസന്ധിയാണ് നാട് വിടലിന് കാരണമെന്നാണ് പ്രാഥമിക നിഗമനം.
