ലോകേഷ് സിനിമാറ്റിക് യൂണിവേഴ്സിലെ ആരാധകർ ഏറ്റവും കാത്തിരുന്ന ചിത്രമായിരുന്നു വിജയ്- ലോകേഷ് കൂട്ടുകെട്ടിൽ 2023 ൽ പുറത്തിറങ്ങിയ ലിയോ. കാർത്തി നായകനായ കൈതി, കമൽ ഹാസൻ, വിജയ് സേതുപതി, ഫഹദ് ഫാസിൽ എന്നിവർ പ്രധാന വേഷത്തിലെത്തിയ വിക്രം എന്നീ സിനിമകൾക്ക് ശേഷം ലോകേഷ് സിനിമാറ്റിക് യൂണിവേഴ്സിലേക്കുള്ള അടുത്ത ചിത്രമായാണ് ലിയോ എത്തിയത്.
പ്രേക്ഷകർക്കിടയിൽ നിന്ന് സമ്മിശ്ര അഭിപ്രായം വന്നെങ്കിലും ബോക്സ് ഓഫീസിൽ കളക്ഷനിൽ തമിഴ് നാട്ടിലും കേരളത്തിലും ഏറ്റവും മുന്നിലായിരുന്നു ലിയോ. ലിയോ 2 ഉണ്ടാകുമോ എന്ന ആരാധകരുടെ ചോദ്യത്തിന് ഉത്തരം നൽകിയിരിക്കുകയാണ് സംവിധായകൻ ലോകേഷ് കനഗരാജ്. വിജയ് തയ്യാറാവുകയാണെങ്കിൽ ലിയോ 2 ഉണ്ടാകുമെന്ന് തന്നെയാണ് ലോകേഷിന്റെ മറുപടി. കവിൻ നായകനായ ബ്ലഡി ബെഗ്ഗർ എന്ന ചിത്രം കണ്ടിറങ്ങിയ ശേഷം മാധ്യമങ്ങളെ കാണുകയായിരുന്നു ലോകേഷ്.
കഴിഞ്ഞ ദിവസമാണ് എൽ. സി. യുവിനെ പറ്റിയുള്ള രണ്ട് പ്രധാനപ്പെട്ട അപ്ഡേറ്റുകൾ അണിയറപ്രവർത്തകർ പുറത്തു വിട്ടത്. അതിലൊന്ന് എൽ സി യു വിന്റെ ആരംഭം കാണിക്കുന്ന പത്തുമിനിറ്റ് ദൈർഘ്യമുള്ള ഒരു ഹ്രസ്വചിത്രത്തിന്റെ പോസ്റ്ററാണ്. മറ്റൊന്ന് എൽ. സി. യുവിലെ പുതിയ കഥാപാത്രത്തിനെ പരിചയപ്പെടുത്തുന്ന വീഡിയോയും. രാഘവ ലോറൻസാണ് സിനിമാറ്റിക് യൂണിവേഴ്സിൽ പുതുതായി എത്തുന്ന കഥാപാത്രം- ബെൻസ്. എൽ സി യു വിൽ ഇവർക്ക് പുറമെ സൂര്യയും പ്രധാനപ്പെട്ട വേഷം ചെയ്യുന്നുണ്ട്.
