ന്യൂഡല്‍ഹി: രാജ്യത്തെ അനധികൃത കുടിയേറ്റക്കാരെ ഒഴിപ്പിക്കുന്നതിന്റെ ഭാഗമായി ജനുവരി മുതല്‍ ഇന്നുവരെ ആകെ 682 ഇന്ത്യക്കാരെ യുഎസില്‍നിന്നു നാടുകടത്തിയതായി കേന്ദ്രസര്‍ക്കാര്‍. ഇന്നലെ പാര്‍ലമെന്റില്‍ അറിയിച്ചതാണ് ഇക്കാര്യം. നാടുകടത്തിയവരില്‍ ഭൂരിഭാഗവും നിയമവിരുദ്ധമായി രാജ്യത്തേക്കു പ്രവേശിക്കാന്‍ ശ്രമിക്കുന്നതിനിടെ അതിര്‍ത്തിയില്‍ പിടിയിലായവരാണ്. വിദേശകാര്യ സഹമന്ത്രി കീര്‍ത്തി വര്‍ധന്‍ സിങ്ങാണ് ഇക്കാര്യങ്ങള്‍ പറഞ്ഞത്. കൃത്യമായ രേഖകളില്ലാത്തതിനാല്‍ യുഎസില്‍നിന്നു നാടുകടത്തലോ മറ്റു നിയമനടപടികളോ നേരിടുന്ന പൗരന്മാരെ പിന്തുണയ്ക്കുന്നതിന് ഇന്ത്യ സ്വീകരിച്ച നടപടികളെക്കുറിച്ചും അദ്ദേഹം ലോക്സഭയെ അറിയിച്ചു.
ഇന്ത്യന്‍ പൗരരാണെന്നു സ്ഥിരീകരിച്ചശേഷം മാത്രമേ ആളുകളെ ഇന്ത്യയിലേക്ക് അയക്കാന്‍ അനുവദിക്കുകയുള്ളൂ. അതിനായി, നാടുകടത്തപ്പെടുന്നവരുടെ പട്ടിക ഇന്ത്യന്‍ സര്‍ക്കാരിലെ ബന്ധപ്പെട്ട ഏജന്‍സികള്‍ സൂക്ഷ്മമായി പരിശോധിച്ചു സ്ഥിരീകരിക്കുന്നുണ്ട്. എന്നാല്‍, അനധികൃതമായി യുഎസിലേക്കു കുടിയേറിയവരുടെ കണക്കു സര്‍ക്കാര്‍ സൂക്ഷിക്കുന്നില്ല. ഈ വിഷയത്തെക്കുറിച്ചുള്ള ഒരു പ്രത്യേക ചോദ്യത്തിനു മറുപടിയായാണ് ഇക്കാര്യങ്ങള്‍ മന്ത്രി വ്യക്തമാക്കിയത്.
അനധികൃത കുടിയേറ്റം, മനുഷ്യക്കടത്ത് തുടങ്ങിയ പ്രശ്നങ്ങള്‍ പരിഹരിക്കുന്നതിന് ഇതില്‍ ഏര്‍പ്പെട്ടിട്ടുള്ളവര്‍ക്കെതിരെ ശക്തമായ നടപടി സ്വീകരിക്കുന്നുണ്ടെന്നും അദ്ദേഹം പറഞ്ഞു. യുഎസ് അധികൃതരില്‍ നിന്നും തിരികെ നാടുകടത്തപ്പെട്ട കുടിയേറ്റക്കാരില്‍ നിന്നും ലഭിച്ച വിവരങ്ങളുടെ അടിസ്ഥാനത്തില്‍ ഇത്തരം റാക്കറ്റുകള്‍ നടത്തുന്ന നിരവധി അനധികൃത കുടിയേറ്റ ഏജന്റുമാര്‍, സഹായങ്ങള്‍ ചെയ്തു നല്‍കുന്ന ക്രിമിനലുകള്‍, മനുഷ്യക്കടത്തു സിന്‍ഡിക്കേറ്റുകള്‍ എന്നിവര്‍ക്കെതിരെ അന്വേഷണങ്ങളും നടപടികളും തുടരുകയാണെന്നും അദ്ദേഹം കൂട്ടിച്ചേര്‍ത്തു.
ഒപ്പം, വിദ്യാര്‍ഥി-പ്രഫഷനലുകളുടെയും സഞ്ചാരവും ഹ്രസ്വകാല ടൂറിസ്റ്റ്-ബിസിനസ് യാത്രകളും സുഗമമാക്കുന്നതിനു സുരക്ഷിതവും പരസ്പരം പ്രയോജനകരവുമായ ഇടപെടലുകള്‍ക്കായി സര്‍ക്കാര്‍ യുഎസുമായി ബന്ധപ്പെടുന്നുണ്ടെന്നും മന്ത്രി പറഞ്ഞു.
