2019 ൽ പുറത്തിറങ്ങിയ ഹോളിവുഡിലെ ക്ലാസിക് ചിത്രമായിരുന്നു ജോക്കര്‍. വാക്വിന്‍ ഫീനിക്സ് നായകനായി ടോഡ് ഫിലിപ്പ് സംവിധാനം ചെയ്ത ജോക്കറിന് രണ്ടാം ഭാഗം വരുന്നുവെന്ന് കേട്ടപ്പോള്‍ ആരാധകര്‍ ആവേശത്തിലായിരുന്നു. എന്നാല്‍ രണ്ടാം ഭാഗമായ ജോക്കര്‍: ഫോളി അഡ്യൂ റിലീസിന് ശേഷം പ്രേക്ഷകരുടെ പ്രതീക്ഷയ്‌ക്കൊത്ത് ഉയര്‍ന്നില്ല എന്ന് കടുത്ത വിമര്‍ശനങ്ങള്‍ ഉയർന്നു വന്നിരുന്നു.
ജോക്കര്‍ 2 എക്കാലത്തേയും മോശം ചിത്രമെന്ന് തുറന്നടിച്ചിരിക്കുകയാണ് ജോക്കര്‍ 2 വിലെ അഭിനേതാവ് കൂടിയായ ടിം ഡിലൻ. ചിത്രത്തിൽ അര്‍ഖം അസൈലത്തിലെ ഗാര്‍ഡിന്റെ വേഷം ചെയ്ത അഭിനേതാവാണ് ടിം ഡിലൻ.
ജോക്കര്‍ ആദ്യ ഭാഗത്തിന് ശേഷം ഞാന്‍ ചില അഭിപ്രായങ്ങള്‍ കേട്ടു. സ്ത്രീകളെ ലൈംഗികമായി ആകര്‍ഷിക്കാന്‍ കഴിയാത്തവര്‍ക്ക് ഈ ചിത്രം ഇഷ്ടപ്പെടും, തെറ്റായ കൂട്ടത്തില്‍ പെട്ട ആളുകളാണ് ഇത് ഇഷ്ടപ്പെടുന്നത്, തെറ്റായ സന്ദേശമാണ് ചിത്രം നല്‍കുന്നത്, പുരുഷന്മാരുടെ കോപമാണ് ഇത് എന്നെല്ലാമുള്ള അഭിപ്രായങ്ങളാണ് ഞാന്‍ കേട്ടത്. ഇതെല്ലാമാകും അണിയറ പ്രവർത്തകരെ മാറി ചിന്തിക്കാന്‍ പ്രേരിപ്പിച്ചതും രണ്ടാം ഭാഗം മോശമാകാന്‍ കാരണമായതെന്നും ഞാൻ കരുതുന്നു എന്ന് ടിം ഡിലൻ അഭിപ്രായപ്പെട്ടു.
