മൂത്ത സഹോദരിയെ കൂടുതല്‍ സ്നേഹിക്കുന്നുവെന്ന് ആരോപിച്ച് ഇളയ മകള്‍ അമ്മയെ കുത്തിക്കൊന്നു. കുര്‍ളയിലെ ഖുറേഷി നഗറിലാണ് സംഭവം. വ്യാഴാഴ്ച രാത്രി രേഷ്മ മുസാഫര്‍ ഖാസിയാണ് (41) 62 കാരിയായ അമ്മ സാബിറ ബാനോ അസ്ഗര്‍ ഷെയ്ഖിനെ കുത്തിക്കൊലപ്പെടുത്തിയത്. മൂത്ത സഹോദരിയോട് അമ്മയ്ക്ക് കൂടുതല്‍ ഇഷ്ടമാണെന്ന് രേഷ്മ വിശ്വസിച്ചിരുന്നു, ഇത് ഇരുവരും തമ്മിലുള്ള പകയ്ക്ക് കാരണമായി.
സാബിറ ഇന്നലെ വൈകിട്ട് രേഷ്മയുടെ വീട്ടില്‍ എത്തുകയും ഇരുവരും തമ്മില്‍ വാക്കുതര്‍ക്കം ഉണ്ടാവുകയും ചെയ്തു. തുടര്‍ന്ന് രേഷ്മ അടുക്കളയില്‍ നിന്ന് കത്തിയെടുത്ത് അമ്മയെ കുത്തിക്കൊലപ്പെടുത്തുകയുമായിരുന്നു. കൃത്യം നടത്തിയ ശേഷം രേഷ്മ ചുനഭട്ടി പോലീസ് സ്റ്റേഷനിലെത്തി കുറ്റം സമ്മതിച്ചു. ഉദ്യോഗസ്ഥര്‍ ഉടന്‍ സംഭവസ്ഥലം സന്ദര്‍ശിച്ച് അമ്മയുടെ മരണം സ്ഥിരീകരിച്ച് രേഷ്മയെ കസ്റ്റഡിയിലെടുത്തു.
രേഷ്മയെ കോടതിയില്‍ ഹാജരാക്കി 14 ദിവസത്തേക്ക് റിമാന്‍ഡ് ചെയ്തു. കൊലപാതകത്തിന് പിന്നില്‍ സ്വത്ത് തര്‍ക്കമടക്കമുള്ള കാര്യങ്ങള്‍ പോലീസ് അന്വേഷിക്കുന്നുണ്ട്. രേഷ്മയുടെ മാനസികാരോഗ്യം വിലയിരുത്തുന്നതിന് കുടുംബാംഗങ്ങളില്‍ നിന്നും അയല്‍വാസികളില്‍ നിന്നും മൊഴി രേഖപ്പെടുത്തി.
