ആഗോള തലത്തില്‍ എം പോക്‌സ് വൈറസ് രോഗത്തിന്റെ വ്യാപനശേഷി കണക്കിലെടുത്ത് ലോകാരോഗ്യ സംഘടന പൊതുജനാരോഗ്യ അടിയന്തിരാവസ്ഥ പ്രഖ്യാപിച്ചു. എം പോക്‌സ് രോഗത്തെ കുരുങ്ങുപനി എന്നും മങ്കിപോക്‌സ് എന്നും തെറ്റായി പറയാറുണ്ട്. അതുകൊണ്ട് തന്നെയാണ് ലോകാരോഗ്യ സംഘടന ഈ വൈറസ് ബാധയെ എം.പോക്‌സ് എന്ന് വിശേഷിപ്പിക്കുന്നത്.ഇത് ഒരു ജന്തുജന്യ രോഗമാണ്. മൃഗങ്ങളില്‍ നിന്നും മനുഷ്യരിലേക്കും മനുഷ്യരില്‍ നിന്ന് മനുഷ്യരിലേക്കും പകരും.
പോക്‌സ് വൈറിഡേ കുടുംബത്തിലെ ഓര്‍ത്തോ പോക്‌സ് വിഭാഗത്തില്‍പ്പെടുന്ന എം പോക്‌സ് വൈറസാണ് രോഗം ഉണ്ടാക്കുന്നത്. രോഗവാഹകര്‍ ആയ കുരങ്ങുകള്‍, ചിലതരം അണ്ണാനുകള്‍, എലികള്‍ എന്നിവയിലും വൈറസിന്റെ സാന്നിധ്യം കണ്ടെത്തിയിട്ടുണ്ട്. കുരങ്ങുകളില്‍ ആദ്യമായി കണ്ടെത്തിയതിനാലാണ് മങ്കിപോക്‌സ് അഥവാ എംപോക്‌സ് എന്ന പേര് വന്നത്. എന്നാല്‍ കുരങ്ങുകള്‍ ഈ വൈറസിന്റെ സ്വാഭാവിക സംഭരണികള്‍ ആണോ എന്ന് ഇനിയും തെളിയിക്കപ്പെട്ടിട്ടില്ല.രോഗമുള്ള മനുഷ്യരില്‍ നിന്നും നേരിട്ടുള്ള സമ്പര്‍ക്കത്തിലൂടെയും ലൈംഗിക ബന്ധത്തിലൂടെയും രോഗി ഉപയോഗിച്ച വസ്ത്രങ്ങള്‍, കിടക്ക, ടവ്വലുകള്‍, ഇലക്ട്രോണിക് ഉപകരണങ്ങള്‍, സമ്പര്‍ക്ക പ്രതലങ്ങള്‍ എന്നിവയിലൂടെയുമെല്ലാം രോഗ പകര്‍ച്ച ഉണ്ടാവും. ഗര്‍ഭസ്ഥ ശിശുവിന് അമ്മയില്‍ നിന്നും ഈ രോഗം പകരാം.
രോഗകാരികള്‍ ആയ വൈറസ് ശരീരത്തിനുള്ളില്‍ പ്രവേശിച്ചാല്‍ സാധാരണ 6 മുതല്‍ 13 ദിവസങ്ങള്‍ക്കുള്ളില്‍ രോഗലക്ഷണങ്ങള്‍ പ്രകടമാകും.21 ദിവസങ്ങള്‍ വരെ ചിലപ്പോള്‍ രോഗാരംഭകാലം നീണ്ടുപോകാറുണ്ട്. രണ്ടു മുതല്‍ നാലു വരെ ആഴ്ച നീണ്ടുനില്‍ക്കുന്ന ദ്രാവകംനിറഞ്ഞ വേദനയുള്ള കുമിളകള്‍ ആണ് ആദ്യ ലക്ഷണം. മുഖത്ത് പ്രത്യക്ഷപ്പെടുന്ന ഇത്തരം കുമിളകള്‍ പെട്ടെന്ന് ശരീരമാകെ വ്യാപിക്കും. കഠിനമായ പനി, തലവേദന, പേശി വേദന, ലസികാ ഗ്രന്ഥികളുടെ വീക്കം എന്നീ ലക്ഷണങ്ങളും കാണിക്കും. മരണനിരക്ക് കുറവാണെങ്കിലും മറ്റ് രോഗങ്ങള്‍ ഉള്ളവരിലും, രോഗപ്രതിരോധ ശേഷി കുറഞ്ഞവരിലും രോഗം തീവ്രമായേക്കാം.
