രഞ്ജി ട്രോഫി ക്രിക്കറ്റില്‍ കരുത്തരായ ഉത്തര്‍പ്രദേശിനെതിരെ കേരളത്തിന് തകര്‍പ്പന്‍ ജയം. തുമ്പ സെന്റ് സേവ്യേഴ്‌സ് ഗ്രൗണ്ടില്‍ നടന്ന മത്സരത്തില്‍ ഇന്നിംഗ്‌സിനും 117 റണ്‍സിനുമാണ് കേരളം ഉത്തര്‍പ്രദേശിനെ തോല്‍പ്പിച്ചത്. ഇന്നിംഗ്‌സ് ജയത്തോടെ ബോണസ് ഉള്‍പ്പെടെ ഏഴ് പോയിന്റും കേരളം സ്വന്തമാക്കി.
ഒന്നാം ഇന്നിംഗ്‌സില്‍ 233 റണ്‍സ് ലീഡ് നേടിയ കേരളത്തിനെതിരെ ഉത്തര്‍പ്രദേശ് രണ്ടാം ഇന്നിംഗ്‌സില്‍ 116 റണ്‍സിന് പുറത്തായി. 41 റണ്‍സ് മാത്രം വഴങ്ങി ആറ് വിക്കറ്റ് വീഴ്ത്തിയ സ്പിന്‍ ഓള്‍റൗണ്ടര്‍ ജലജ് സക്‌സേനയാണ് സന്ദര്‍ശകരെ തകര്‍ത്തത്. ആദ്യ ഇന്നിംഗ്‌സില്‍ അഞ്ച് വിക്കറ്റ് നേടിയ സക്‌സേന മത്സരത്തില്‍ മൊത്തം 11 വിക്കറ്റുകളാണ് സ്വന്തമാക്കിയത്.
നേരത്തെ ഉത്തര്‍ പ്രദേശിനെ ഒന്നാം ഇന്നിംഗ്‌സില്‍ 162 റണ്‍സിന് എറിഞ്ഞിട്ട കേരളം മറുപടിയായി 395 റണ്‍സാണ് അടിച്ചെടുത്തത്. സല്‍മാന്‍ നിസാര്‍ (93), ക്യാപ്റ്റന്‍ സച്ചിന്‍ ബേബി (83) എന്നിവരുടെ പ്രകടനമാണ് നിര്‍ണായകമായത്. ബാറ്റര്‍മാരും ബൗളര്‍മാരും ഒരു പോലെ തിളങ്ങിയതോടെയാണ് കേരളം ഉജ്ജ്വല വിജയം സ്വന്തമാക്കിയത്.
