തിരുവനന്തപുരം: തിരുവനന്തപുരം വഞ്ചിയൂരിൽ സ്ത്രീക്ക് നേരെ വെടിവെപ്പ്. പടിഞ്ഞാറെകോട്ട ചെമ്പകശ്ശേരി റസി‍ഡൻസ് അസോസിയേഷനിലെ പങ്കജ് വീട്ടിൽ സിനിക്കാണ് വെടിവെപ്പിൽ പരിക്കേറ്റത്. മുഖം മറച്ചെത്തിയ യുവതിയാണ് എയർഗൺ ഉപയോഗിച്ച് സിനിയെ വെടിവച്ചത്. ഇന്ന് രാലിലെ 8.30ഓടെ വഞ്ചിയൂർ പടിഞ്ഞാറെകോട്ടയിലാണ് സംഭവം.
സിനിയെ ചാക്കയിലെ സ്വകാര്യ ആശുപത്രിയിൽ പ്രവേശിപ്പിച്ചു. സിനിയുടെ പരിക്ക് ഗുരുതരമല്ല. കൊറിയർ നൽകാനെന്ന് പറഞ്ഞ് സിനിയുടെ വീട്ടിലെത്തിയായിരുന്നു ആക്രമണം. കൊറിയറുമായി വീട്ടിലെത്തിയ യുവതി മേൽവിലാസം പരിശോധിച്ച ശേഷം സിനിയെ തോക്കെടുത്ത് വെടിവെക്കുകയായിരുന്നു. വെടിവെച്ച ശേഷം യുവതി ഓടി രക്ഷപ്പെട്ടു. സംഭവത്തിൽ പൊലീസ് അന്വേഷണം ആരംഭിച്ചു.
