മലപ്പുറം:വിവാഹത്തിന് തൊട്ടുമുമ്പ് നവ വരന്‍ ജീവനൊടുക്കിയ സംഭവത്തില്‍ പൊലീസ് അന്വേഷണം ആരംഭിച്ചു.മലപ്പുറം കരിപ്പൂരില്‍ കമ്മിണിപ്പറമ്പ് സ്വദേശി ജിബിന്‍ ആത്മഹത്യ ചെയ്തത്.ഇന്നലെയാണ് വിവാഹ ചടങ്ങുകള്‍ക്ക് തൊട്ടുമുമ്പ് രാവിലെ വീട്ടിലെ ശുചി മുറിയിലാണ് കൈ ഞെരമ്പ് മുറിച്ച് മരിച്ച നിലയില്‍ ജിബിനെ കണ്ടെത്തിയത്.കഴുത്തില്‍ കയറിട്ടു കുരുക്കിയിട്ടുമുണ്ടായിരുന്നു. ജിബിന്റെ ഫോണിലെ കോളുകള്‍ അടക്കം പൊലീസ് പരിശോധിച്ചുവരികയാണ്.
ഇന്നലെ രാവിലെ 9.45നും 10.45നും ഇടയിലുള്ള മുഹൂര്‍ത്തത്തിലായിരുന്നു ജിബിനും കോഴിക്കോട് ചെറുവണ്ണൂര്‍ സ്വദേശിനിയും തമ്മിലും വിവാഹം നിശ്ചയിച്ചിരുന്നത്.ജിബിന്റെ പെരുമാറ്റത്തില്‍ യാതൊരു അസ്വഭാവികതയും വീട്ടുകാര്‍ക്കോ ബന്ധുക്കള്‍ക്കോ കൂട്ടുകാര്‍ക്കോ തോന്നിയില്ല. വിവാഹ ദിവസം രാവിലെയും ജിബിന്‍ സന്തോഷവാനായിരുന്നു. ആത്മഹത്യയുടെ കാരണം എന്തെന്ന് അടുത്ത സുഹൃത്തുക്കള്‍ക്കടക്കം ആര്‍ക്കും അറിയില്ല. വീട്ടുകാര്‍ക്കു പുറമേ ബന്ധക്കളും സുഹൃത്തുക്കളുമടക്കം നിരവധി പേര്‍ വീട്ടിലുണ്ടായിരുന്ന സമയത്താണ് ജിബിന്‍ ജീവനൊടുക്കിയത്.സംഭവത്തില്‍ കരിപ്പൂര്‍ പൊലീസ് അസ്വഭാവിക മരണത്തിന് കേസ് എടുത്ത് അന്വേഷണം തുടങ്ങി.മഞ്ചേരി മെഡിക്കല്‍ കോളേജ് ആശുപത്രിയില്‍ പോസ്റ്റ്‌മോര്‍ട്ടത്തിനു ശേഷം മൃതദേഹം ബന്ധുക്കള്‍ക്ക് വിട്ടു നല്‍കി.
