തിരുവനന്തപുരം: എഡിജിപി എം.ആര്‍ അജിത്ത് കുമാറും ആര്‍എസ്എസ് നേതാവ് ദത്താത്രേയ ഹൊസബലയും തമ്മില്‍ നടത്തിയ കൂടിക്കാഴ്ച ദുരൂഹമെന്ന് കെസി വേണുഗോപാല്‍. സംസ്ഥാനത്തെ പാര്‍ട്ടി നേതൃത്വത്തിന് ഇക്കാര്യത്തില്‍ എന്തോ ഒളിച്ചുവെക്കാനുണ്ട്. സിപിഎമ്മിനെ ആര്‍എസ്എസിന് പിന്നില്‍ കെട്ടിയിടാനാണോ നേതൃത്വത്തിന്റെ ശ്രമമെന്ന് കേന്ദ്ര നേതൃത്വം വ്യക്തമാക്കണം. വിഷയത്തില്‍ മറുപടി പറയാന്‍ സിപിഎമ്മിനാകുന്നില്ല. മുഖ്യമന്ത്രി ഇക്കാര്യത്തില്‍ നിലപാട് വ്യക്തമാക്കണമെന്നും അദ്ദേഹം ആവശ്യപ്പെട്ടു.
തൃശ്ശൂര്‍ പൂരം കലക്കിയതില്‍ ആഭ്യന്തരവകുപ്പിന് പങ്കുണ്ടെന്ന് ആക്ഷേപം വന്നു കഴിഞ്ഞു. ആര്‍എസ്എസുമായി ചങ്ങാത്തം ഉണ്ടാക്കാന്‍ ഒരു പോലീസ് ഉദ്യോഗസ്ഥന്‍ ഇടനിലക്കാരനായി. മുഖ്യമന്ത്രി മൗനം വെടിയണം. എന്തെങ്കിലും പറഞ്ഞു ഒഴിയാന്‍ പറ്റുന്നതല്ല ജനം എല്ലാം കാണുന്നുണ്ട്. അന്വേഷണം ആവശ്യപ്പെടുന്നവരെ തല്ലിച്ചതയ്ക്കുന്ന നിലപാടാണ് ആഭ്യന്തര വകുപ്പിനെന്നും കെ സി വേണുഗോപാല്‍ വ്യക്തമാക്കി.
