പുത്തന്‍ അപ്ഡേറ്റുകളുമായി പുതിയ വേര്‍ഷന്‍ പുറത്തിറക്കാൻ തയ്യാറെടുത്ത് ആന്‍ഡ്രോയിഡ്. ബാഴ്‌സലോണയില്‍ നടന്ന മൊബൈല്‍ വേള്‍ഡ് കോണ്‍ഗ്രസിലാണ് കമ്പനിയുടെ വെളിപ്പെടുത്തൽ. ആന്‍ഡ്രോയിഡ് 16 ഭാഗികമായി തയ്യാറാണെന്നും, സോഫ്റ്റ്വെയറില്‍ അവസാന അപ്‌ഡേഷന്‍ നടന്നുകൊണ്ടിരിക്കുകയാണെന്നും കമ്പനി അറിയിച്ചു.
ഗൂഗിളിന്റെ റിലീസ് ടൈംലൈനിലും ഇക്കാര്യം സൂചിപ്പിച്ചിട്ടുണ്ട്. ഡെവലപ്പര്‍മാര്‍ക്കും ബീറ്റ ടെസ്റ്റര്‍മാര്‍ക്കും വേണ്ടിയാണ് പ്രധാനമായും ആന്‍ഡ്രോയിഡ് 16 ബീറ്റ പുറത്തിറക്കുന്നത്. നിരവധി സ്വകാര്യതയും സെക്യൂരിറ്റി അപ്ഡേറ്റുകളും ഉള്‍പ്പെടുത്തിയാകും ആന്‍ഡ്രോയിഡ് 16 പുറത്തിറങ്ങുക.
മുഖ്യമായ ആപ്പ് ലിസ്റ്റ്, നോട്ടിഫിക്കേഷന്‍ തുടങ്ങിയ ഇടങ്ങളില്‍ നിന്ന് സെന്‍സിറ്റീവ് ആപ്പുകളെ ഹൈഡ്ചെയ്യുന്നതടക്കമുള്ള പ്രത്യേകതകള്‍ സോഫ്റ്റ്വെയറിനുണ്ട്. ഉപയോക്താക്കള്‍ക്ക് കൂടുതല്‍ സ്വകാര്യത നല്‍കാനുള്ള ഫീച്ചറാണിത്. കുട്ടികള്‍ കൂടി ഉപയോഗിക്കുന്ന ഫോണുകളില്‍ ഇത്തരം ഫീച്ചറുകള്‍ ഉപയോഗമാകുമെന്നാണ് വിലയിരുത്തല്‍.
ആന്‍ഡ്രോയിഡ് 16ല്‍ പ്രവര്‍ത്തിക്കുന്ന സ്മാര്‍ട്ട്‌ഫോണുകള്‍ക്കായി ജെമിനി എ.ഐയെ പൂര്‍ണമായ ഒരു ഏജന്റിക് എ.ഐ അസിസ്റ്റന്റാക്കി മാറ്റും. ആന്‍ഡ്രോയിഡ് അതോറിറ്റിയുടെ റിപ്പോര്‍ട്ട് അനുസരിച്ച് ആന്‍ഡ്രോയിഡ് 16 അപ്‌ഡേറ്റില്‍ ജെമിനി എ.ഐക്കായി പുതിയ ‘ആപ്പ് ഫംഗ്ഷനുകള്‍’ അവതരിപ്പിക്കും. ഇത് ഉപഭോക്താക്കളെ ആപ്പിനുള്ളിലെ പ്രവര്‍ത്തനങ്ങളില്‍ കൂടുതല്‍ സഹായിക്കും.
