പൊതുമേഖല ടെലികോം കമ്പനിയായ ബിഎസ്എന്‍എല്ലിന്റെ 4ജി വ്യാപനം തുടരുന്നതിനിടെ ‘യൂണിവേഴ്സല് സിം’ പ്ലാറ്റ്ഫോം അവതരിപ്പിച്ചിരിക്കുകയാണ് കമ്പനി. പുതിയ സിം കാര്‍ഡ് എടുക്കാതെതന്നെ ഉപഭോക്താക്കള്‍ക്ക് യൂണിവേഴ്സല് സിം പ്ലാറ്റ്ഫോം വഴി 4ജി ലഭ്യമാകും. ഭാവിയില്‍ ഇതേ സിം ഉപയോഗിച്ച് 5ജി നെറ്റ് വര്‍ക്ക്‌ ആസ്വദിക്കാം. അതായത് 4ജിയോ, 5ജിയോ ലഭ്യമാകാന്‍ പുതിയ സിം കാര്‍ഡ് എടുക്കേണ്ടതില്ല എന്ന് ചുരുക്കം. ഇന്ത്യയിലെവിടെയും ഈ സൗകര്യം ഉപഭോക്താക്കള്‍ക്ക് ഉപയോഗിക്കാം.
ഓവര്‍-ദി-എയര്‍ സംവിധാനമാണ് ബിഎസ്എന്‍എല്‍ പുതുതായി അവതരിപ്പിച്ചിരിക്കുന്ന മറ്റൊരു സാങ്കേതികവിദ്യ. ബിഎസ്എന്‍എല്‍ ഓഫീസില്‍ പോകാതെ തന്നെ നേരിട്ട് 4ജി, 5ജി നെറ്റ് വർക്കുകളിലേക്ക് സിം അപ്ഗ്രേഡ് ചെയ്യാനുള്ള സംവിധാനമാണിത്.ഈ വര്‍ഷം ഒക്ടോബര്‍ അവസാനത്തോടെ 80,000 ടവറുകള്‍ 4ജിലേക്ക് മാറ്റാനാണ് ബിഎസ്എന്‍എല്‍ നീക്കം. 2025 മാര്‍ച്ചോടെ 21,000 ടവറുകള്‍ കൂടി 4ജിയാവും. ഇതോടെ ഒരുലക്ഷം ബിഎസ്എന്‍എല്‍ ടവറുകള്‍ രാജ്യമെമ്പാടും 4ജി നെറ്റ്‌വര്‍ക്ക് എത്തിക്കും.അടുത്ത വര്‍ഷം ആദ്യം 5ജിയും ബിഎസ്എന്‍എല്‍ എത്തിക്കും എന്നാണ് കരുതുന്നത്.
