കൊച്ചി: ഇടപ്പള്ളിയിൽ സ്വകാര്യ ബസ് ജീവനക്കാർ നടുറോഡിൽ തമ്മിലടിച്ചു. സമയ ക്രമത്തെ ചൊല്ലിയുള്ള തർക്കമാണ് മാരകായുധങ്ങളുമായി ഏറ്റുമുട്ടാൻ കാരണമായത്. ബസിന്റെ ചില്ലും അടിച്ച് തകർത്തു. പുളിക്കൽ, കിസ്മത്ത് എന്നീ ബസുകളിലെ ജീവനക്കാർ തമ്മിലാണ് സംഘർഷമുണ്ടായത്. കമ്പിവടിയും വാക്കത്തിയും ഉപയോഗിച്ചാണ് ആക്രമണം നടത്തിയത്. നഗരത്തിലെ തിരക്കേറിയ റോഡിലായിരുന്നു സംഘർഷം.
സംഘർഷത്തിനിടെ പറവൂരിൽനിന്നു വന്ന ബസിന്റെ ചില്ലും അടിച്ചു തകർത്തു. അക്രമത്തിന്റെ ദൃശ്യങ്ങൾ സമൂഹ മാധ്യമങ്ങളിലൂടെ വ്യാപകമായി പ്രചരിച്ചു. സംഭവത്തിൽ കേസെടുക്കുമെന്ന് എളമക്കര പോലീസ് അറിയിച്ചു. സ്വകാര്യ ബസുകളുടെ മത്സരയോട്ടം നഗരത്തിലെ പതിവ് കാഴ്ച്ചയാണ്.
