കോഴിക്കോട്: കോണ്‍ഗ്രസുകാരനാകാന്‍ ആഗ്രഹമുണ്ടെന്ന് എഴുത്തുകാരന്‍ എം മുകുന്ദന്‍. കോഴിക്കോട് കെ പി കേശവമേനോന്‍ ഹാളില്‍ നടന്ന സുഭാഷ് ചന്ദ്രന്റെ പുസ്തക പ്രകാശനച്ചടങ്ങില്‍ സംസാരിക്കുകയായിരുന്നു അദ്ദേഹം. കോണ്‍ഗ്രസുകാരുടെ വെളള വസ്ത്രം തന്നെ ആകര്‍ഷിക്കാറുണ്ടെന്നും അതിനാല്‍ കോണ്‍ഗ്രസുകാരനാകാന്‍ ആഗ്രഹമുണ്ടെന്നുമാണ് എം മുകുന്ദന്‍ പറഞ്ഞത്.
കമ്യൂണിസ്റ്റ് നേതാക്കന്മാര്‍ വെള്ളവസ്ത്രം ധരിക്കാറില്ല. അവരെപ്പോഴും കടുത്ത നിറത്തിലുളള കുപ്പായങ്ങളാണ് ധരിക്കുന്നത്. കോണ്‍ഗ്രസുക്കാരെ എപ്പോഴും വെളള വസ്ത്രത്തിലാണ് കാണുന്നതെന്നും എം മുകുന്ദന്‍ പറഞ്ഞു. ഇക്കാലത്ത് കമ്യൂണിസ്റ്റായാലും കോണ്‍ഗ്രസായാലും സത്യം പറയാനുള്ള ആര്‍ജവം മതിയെന്ന് വേദിയിലുണ്ടായ പ്രതിപക്ഷ നേതാവ് വി ഡി സതീശന്‍ മറുപടി പറഞ്ഞു.
വി ഡി സതീശനൊപ്പമുളള ഒരു യാത്രാ അനുഭവവും എം മുകുന്ദന്‍ പങ്കുവെച്ചു. ഒരിക്കല്‍ തിരുവനന്തപുരത്തേക്ക് തീവണ്ടിയില്‍ യാത്രയില്‍ ഒരാള്‍ പുസ്തകം വായിക്കുന്നത് കണ്ട് അത്ഭുതപ്പെട്ടു. ആ വ്യക്തി വി ഡി സതീശനായിരുന്നു. രാഷ്ട്രീയക്കാരില്‍ അദ്ദേഹം നല്ലൊരു വായനക്കാരനാണെന്ന് വി ഡി സതീശന്‍ പറഞ്ഞു.
