ലോസ്ഏഞ്ചല്‍സ്: പ്രശസ്ത ഹോളിവുഡ് നടന്‍ വാല്‍ കില്‍മര്‍ (65) അന്തരിച്ചു. ചൊവ്വാഴ്ച രാത്രി ലോസ് ഏഞ്ചല്‍സിലായിരുന്നു അന്ത്യം. ന്യൂമോണിയയെ തുടര്‍ന്ന് ചികിത്സയിലായിരുന്നു. 2014 ല്‍ അദ്ദേഹത്തിന് തൊണ്ടയില്‍ ക്യാന്‍സര്‍ ബാധിച്ചിരുന്നെങ്കിലും രോഗം ഭേദമായിരുന്നതായി മകള്‍ പറഞ്ഞു.
90 കളില്‍ ഹോളിവുഡില്‍ ഏറ്റവും ഉയര്‍ന്ന പ്രതിഫലം വാങ്ങുന്ന താരമായിരുന്നു കില്‍മര്‍. ടോപ്പ് ഗണ്‍ (1986) എന്ന ചിത്രത്തില്‍ സഹനടനായി അഭിനയിച്ചതോടെയാണ് അദ്ദേഹം ശ്രദ്ധേയനായത്. 1991-ല്‍, ഒലിവര്‍ സ്റ്റോണിന്റെ ദി ഡോര്‍സില്‍, ജിം മോറിസണായി വേഷമിട്ടതും കില്‍മറിന്റെ പ്രശസ്തി വര്‍ധിപ്പിച്ചു. ‘ടോംബ് സ്റ്റോണ്‍’, ‘ഹീറ്റ്’, ‘ബാറ്റ്മാന്‍ ഫോറെവര്‍’ എന്നിവയുള്‍പ്പെടെ വിജയകരമായ നിരവധി ചിത്രങ്ങള്‍ കില്‍മറിന്റെതായി പുറത്തുവന്നു. ഇതെല്ലാം ബോക്‌സ്ഓഫീസില്‍ വലിയ വിജയം നേടുകയും ചെയ്തിരുന്നു.
തൊണ്ടയില്‍ ക്യാന്‍സര്‍ ബാധിച്ചതോടെ അദ്ദേഹത്തിന് സംസാര ശേഷി നഷ്ടപ്പെട്ടിരുന്നു. സിനിമയില്‍ നിന്ന് ഏറെ കാലം വിട്ടുനിന്നിരുന്നുവെങ്കിലും 2021ല്‍ ടോം ക്രൂയിസിന്റെ ‘ടോപ്പ് ഗണ്‍ മാവെറിക്’ എന്ന ചിത്രത്തിലൂടെ സിനിമയിലേക്ക് അദ്ദേഹം തിരിച്ചുവരവ് നടത്തിയിരുന്നു. 2021ല്‍ തന്നെ അദ്ദേഹത്തിന്റെ ജീവിതത്തെ ആസ്പദമാക്കി ‘വാല്‍’ എന്ന ഡോക്യുമെന്ററിയും പുറത്തുവന്നിരന്നു.
