കൊച്ചി: സിനിമയില്‍ കറക്കുകമ്പനി എന്ന ഗുരുതര ആരോപണവുമായി നിര്‍മ്മാതാവും നടിയുമായ സാന്ദ്ര തോമസ്. പ്രൊഡ്യൂസേഴ്സ് അസോസിയേഷനില്‍ നിന്ന് പുറത്താക്കിയതിന് പിന്നാലെയാണ് സാന്ദ്ര ശക്തമായ വിമര്‍ശനം ഉന്നയിച്ചത്.
മലയാള സിനിമയിലെ നിര്‍മ്മാതാക്കളുടെ സംഘടനയ്‌ക്കെതിരെ സാന്ദ്ര പരാതി നല്‍കിയിരുന്നു. ഈ പരാതിയില്‍ പൊലീസ് കേസ് എടുത്തിരുന്നു. ഇതിന് പിന്നാലെയാണ് സംഘടനയില്‍ നിന്ന് സാന്ദ്രയെ പുറത്താക്കിയത്. സംഘടനയുടെ അച്ചടക്കം ലംഘിച്ചതിനാണ് നടപടിയെന്ന് പ്രൊഡ്യൂസേഴ്സ് അസോസിയേഷന്റെ കത്തില്‍ പറയുന്നു.
അതേസമയം എസ്‌ഐടിക്ക് നല്‍കിയ പരാതിയിലുളള പ്രതികാര നടപടിയാണ് സംഘടനയില്‍ നിന്ന് പുറത്താക്കിയതിന് പിന്നിലെന്ന്
സാന്ദ്ര തോമസ് പറഞ്ഞു. ഈ നടപടി ഒട്ടും പ്രതീക്ഷിച്ചില്ലെന്നും സിനിമയില്‍ പവര്‍ ഗ്രൂപ്പ് ഉണ്ടെന്ന് തെളിഞ്ഞുവെന്നും അവര്‍ വെളിപ്പെടുത്തി.
സിനിമയുടെ വിതരണവുമായി ബന്ധപ്പെട്ട യോഗത്തിലേക്ക് വിളിച്ചുവരുത്തി അപമാനിച്ചു. തന്നോട് ഭാരവാഹികള്‍ ലൈംഗിക ചുവയോടെ സംസാരിച്ചു. വനിതാ നിര്‍മാതാവായ തനിക്ക് അപമാനം നേരിട്ടുവെന്നും അതിനാലാണ് പരാതി കൊടുത്തതെന്നും സാന്ദ്ര പ്രതികരിച്ചു.
നിര്‍മ്മാതാവ് ആന്റോ ജോസഫിനെതിരെയും സാന്ദ്ര ശക്തമായ ആരോപണം ഉന്നയിച്ചു. ആന്റോ ജോസഫാണ് തന്നെ വളരെയേറെ ബുദ്ധിമുട്ടിപ്പിച്ചതെന്നും തന്റെ പരാതിക്ക് കാരണം ലൈംഗിക ചുവയോടെ സംസാരിച്ചതാണെന്നും അവര്‍ പറഞ്ഞു.
ഹേമ കമ്മറ്റി റിപ്പോര്‍ട്ടിന് ശേഷം മുന്നോട്ടുവന്നവരാരും ഇനി പരാതിയുമായി വരരുത് എന്നതാണ് അവരുടെ ലക്ഷ്യമെന്നും സാന്ദ്ര തോമസ് കൂട്ടിച്ചേര്‍ത്തു.
