തിരുവനന്തപുരം: ഈ അധ്യയന വര്‍ഷത്തെ എസ്എസ്എല്‍സി, ഹയര്‍ സെക്കന്‍ഡറി പരീക്ഷാ തീയതികള്‍ പ്രഖ്യാപിച്ചു. വിദ്യാഭ്യാസ മന്ത്രി വി.ശിവന്‍കുട്ടി വാര്‍ത്താസമ്മേളനത്തിലാണ് തീയ്യതി പ്രഖ്യാപനം നടത്തിയത്. മാര്‍ച്ച് 3 മുതല്‍ 26 വരെ എസ്എസ്എല്‍സി പരീക്ഷ നടക്കും.
ഫെബ്രുവരി 17 മുതല്‍ എസ്എസ്എല്‍സി പരീക്ഷയ്ക്ക് മുന്നോടിയായുള്ള മോഡല്‍ പരീക്ഷ നടത്താന്‍ നിശ്ചയിച്ചിരിക്കുന്നത്. ഏപ്രില്‍ 8ന് മൂല്യ നിര്‍ണയ ക്യാമ്പ് തുടങ്ങും. മെയ് മാസം മൂന്നാമത്തെ ആഴ്ചയ്ക്കകം ഫലപ്രഖ്യാപനം ഉണ്ടാകും.
ഹയര്‍ സെക്കന്‍ഡറി പരീക്ഷ മാര്‍ച്ച് 6 മുതല്‍ 29 വരെയാണ് നിശ്ചയിച്ചിരിക്കുന്നത്. ഒന്ന് മുതല്‍ ഒന്‍പത് വരെ ക്ലാസുകളിലേക്കുള്ള പരീക്ഷ ഫെബ്രുവരി അവസാനം ആരംഭിക്കുമെന്നും മന്ത്രി അറിയിച്ചു.
മിനിമം മാര്‍ക്ക് സംവിധാനം
സമ്പൂര്‍ണ്ണ വിജയം എന്നതില്‍ നിന്ന് മാറി ഈ വര്‍ഷം മുതല്‍ മിനിമം മാര്‍ക്ക് സംവിധാനം കൊണ്ടുവരാനുളള നീക്കത്തിലാണ് സര്‍ക്കാര്‍. ഈ അധ്യയന വര്‍ഷം എട്ടാം ക്ലാസ്സിലും അടുത്ത വര്‍ഷം ഒന്‍പതാം ക്ലാസ്സിലും മിനിമം മാര്‍ക്ക് നടപ്പില്‍ വരുത്താനാണ് സര്‍ക്കാര്‍ തീരുമാനം.
