ന്യൂയോര്‍ക്ക്: പ്രശസ്ത ബ്രിട്ടീഷ് – ഇന്ത്യന്‍ എഴുത്തുകാരന്‍ സല്‍മാന്‍ റുഷ്ദിയെ കുത്തിക്കൊല്ലാന്‍ ശ്രമിച്ച അക്രമി കുറ്റക്കാരാണെന്ന് കോടതി. 27 കാരനായ പ്രതി യുഎസ് ലെബനീസ് പൗരന്‍ ഹാദി മതറിനുള്ള ശിക്ഷ അമേരിക്കന്‍ പ്രാദേശിക കോടതി ഏപ്രിലില്‍ വിധിക്കും. മുപ്പത് വര്‍ഷം എങ്കിലും തടവ് ശിക്ഷയ്ക്ക് ആണ് സാധ്യത.
2022 ഓഗസ്റ്റിലായിരുന്നു ന്യൂയോര്‍ക്കിലെ പ്രഭാഷണ വേദിയില്‍ വെച്ച് ഹാദി മതര്‍ കൊലപെടുത്താന്‍ ശ്രമിച്ചത്. 15 തവണയാണ് അക്രമി റുഷ്ദിക്ക് മേല്‍ കത്തി കുത്തിയിറക്കിയത്. ആക്രമണത്തില്‍ സല്‍മാന്‍ റുഷ്ദിയുടെ കാഴ്ച ഭാഗികമായി നഷ്ടമായിരുന്നു.
സ്റ്റേജിലുണ്ടായിരുന്ന അഭിമുഖക്കാരനായ ഹെന്റി റീസിനും പരിക്കേറ്റിരുന്നു. റുഷ്ദിയുടെ വിവാദ നോവല്‍ ദി സാത്താനിക് വേഴ്സസ് പ്രസിദ്ധീകരിച്ച് 35 വര്‍ഷങ്ങള്‍ക്ക് ശേഷമായിരുന്നു ആക്രമണം. മരണത്തില്‍ നിന്ന് താന്‍ അത്ഭുതകരമായി രക്ഷപ്പെട്ട അനുഭവം പിന്നീട് റുഷ്ദി ‘നൈഫ്’ എന്ന പുസ്തകത്തിലൂടെ വിവരിച്ചിരുന്നു.
