ആരാധകർ കാത്തിരുന്ന എമ്പുരാൻ സിനിമയുടെ റിലീസ് തീയതി പ്രഖ്യാപിച്ച് അണിയറപ്രവർത്തകർ. ലൂസിഫർ ഫ്രാഞ്ചൈസിയിലെ രണ്ടാമത്തെ സിനിമയാണ് എമ്പുരാൻ. മോഹൻലാൽ, പൃഥ്വിരാജ് സുകുമാരൻ, മഞ്ജു വാര്യർ, ടോവിനോ തോമസ് തുടങ്ങിയവർ അവരുടെ സോഷ്യൽ മീഡിയ പേജുകളിലൂടെയാണ് റിലീസ് തീയതി പ്രഖ്യാപിച്ചത്.
അടുത്ത വർഷം മാർച്ച് 27 നാണ് ആഗോള റിലീസായി ചിത്രം മലയാളം, തമിഴ്, തെലുഗ്, കന്നഡ, ഹിന്ദി തുടങ്ങിയ ഭാഷകളിൽ പ്രേക്ഷകരിലേക്കെത്തുന്നത്. മുരളി ഗോപിയുടെ തിരക്കഥയിൽ ആശിർവാദ് സിനിമാസ് നിർമിച്ച്‌ പൃഥ്വിരാജ് സുകുമാരൻ സംവിധാനം ചെയ്ത സിനിമ മലയാളത്തിലെ ഏറ്റവും പ്രതീക്ഷയേറിയ റിലീസാണ്. എമ്പുരാന്റെ ആദ്യഭാഗമായ ലൂസിഫർ വൻവിജയമായിരുന്നു.
വന്നിരിക്കുന്ന പോസ്റ്ററിൽ രണ്ടുപേരെയാണ് കാണാനാകുന്നത്. വെളുത്ത വസ്ത്രം ധരിച്ച ഒരു വ്യക്തിയുടെ പിൻഭാഗവും, അയാളുടെ വസ്ത്രത്തിനു പുറകിൽ ഒരു ചൈനീസ് ഡ്രാഗണിന്റെ രൂപവും കാണാം. പിന്നിൽ മറഞ്ഞുനിൽക്കുന്ന മോഹൻലാലിനെയും കാണാം. പോസ്റ്റർ ഇറങ്ങിയതിനു ശേഷം സ്റ്റീഫൻ നെടുമ്പള്ളിയുടെ ഒപ്പം പോസ്റ്ററിൽ പ്രത്യക്ഷപ്പെട്ട മറ്റേ വ്യക്തിയാരാണെന്ന ചർച്ചയിലാണ് സോഷ്യൽ മീഡിയ. ഇന്നലെ രാത്രി 9 മണിക്കാണ് പോസ്റ്റർ പുറത്തിറങ്ങിയത്.
