കോഴിക്കോട്: രൂപമാറ്റം വരുത്തിയ നവകേരള ബസിന്റെ ആദ്യ സര്‍വീസ് തുടങ്ങി. അഞ്ച് മാസത്തിന് ശേഷമാണ് ബസ് നിരത്തിലിറങ്ങുന്നത്. കോഴിക്കോട് നിന്ന് ബെംഗളുരുവിലേക്കാണ് ആദ്യ സര്‍വ്വീസ്. നിലവില്‍ ബസിലെ സീറ്റുകളുടെ എണ്ണം 37 ആക്കിയിട്ടുണ്ട്.
ശുചിമുറി ബസില്‍ നിലനിര്‍ത്തിയിട്ടുണ്ട്. ബസിലുണ്ടായിരുന്ന എസ്‌കലേറ്റര്‍, പിന്‍ഡോര്‍ എന്നിവ ഒഴിവാക്കിയിട്ടുണ്ട്. മുന്‍ഭാഗത്ത് മാത്രമാകും ഡോര്‍ ഉണ്ടാവുക. ആദ്യ സര്‍വീസ് തന്നെ ഹൗസ്ഫുള്‍ ആണ്.
നേരത്തെ ബെംഗളൂരുവിലേയ്ക്ക് സര്‍വീസ് നടത്തിയിരുന്ന നവകേരള ബസ് നഷ്ടത്തിലായതോടെ സര്‍വീസ് നിര്‍ത്തുകയായിരുന്നു. ഇതിന് പിന്നാലെയാണ് സീറ്റുകള്‍ വര്‍ദ്ധിപ്പിച്ച് രൂപമാറ്റം വരുത്തി സൂപ്പര്‍ ഡീലക്‌സ് ആക്കി സര്‍വീസ് നടത്താന്‍ കെഎസ്ആര്‍ടിസി തീരുമാനിച്ചത്. നേരത്തെ 1280 രൂപ ആയിരുന്നു ബസ് നിരക്ക്. ഇപ്പോള്‍ 930 രൂപയാണ് ഈടാക്കുന്നത്.
