പാലക്കാട്‌: കൊലപാതക കേസിൽ ശിക്ഷ അനുഭവിച്ച് ജയിലിൽ തുടരവേ ജാമ്യം ലഭിച്ച് പുറത്തിറങ്ങിയ പ്രതി പിന്നെയും രണ്ടുപേരെ വകവരുത്തിയ സംഭവം എല്ലാവരെയും ഞെട്ടിക്കുന്നതായിരുന്നു. ഇരട്ടക്കൊലക്കേസ് പ്രതി ചെന്താമരയെ പൊലീസ് പിടികൂടിയത് സ്വന്തം വീടിന് തൊട്ടടുത്തു നിന്ന് തന്നെയാണ്. ചെന്താമരയ്ക്ക് വിശപ്പ് സഹിക്കാന്‍ കഴിയില്ലെന്ന് അറിയാമായിരുന്നു. ഭക്ഷണം കഴിക്കാന്‍ ഇയാള്‍ വീട്ടിലേക്ക് വരുമെന്നും കണക്കുകൂട്ടി.
പൊലീസിന്റെ കണക്കുകൂട്ടൽ പോലെ തന്നെ ചെന്താമര അവരുടെ വലയിലേക്ക് വന്ന് വീഴുകയായിരുന്നു. പ്രതി കീഴടങ്ങിയതല്ലെന്നും ഓടാന്‍ കഴിയാത്ത അവസ്ഥയായിരുന്നുവെന്നും പൊലീസ് പറഞ്ഞു. പ്രതിയെ പിടിച്ച വാര്‍ത്തയറിഞ്ഞ് നിരവധി പേരാണ് നെന്മാറ പൊലീസ് സ്റ്റേഷന് മുന്നിലെത്തിയത്. പ്രതിയെ പൊലീസ് എത്തിച്ചതോടെ ജനങ്ങളും പൊലീസ് സ്റ്റേഷന്റെ ഗേറ്റിന് സമീപത്തേയ്ക്ക് പാഞ്ഞടുത്തു. ഇതോടെ പൊലീസ് ഗേറ്റ് അടയ്ക്കുകയും ജനങ്ങളെ പുറത്താക്കുകയും ചെയ്തു. ഗേറ്റിന് പുറത്ത് ഇപ്പോഴും സംഘർഷാവസ്ഥ തുടരുകയാണ്.
