ക്വലാലംപുര്‍: അണ്ടര്‍ 19 വനിതാ ടി20 ലോകകപ്പ് ജേതാക്കളായ ഇന്ത്യന്‍ ടീമിന് അഞ്ച് കോടി രൂപ പാരിതോഷികം പ്രഖ്യാപിച്ച് ബി.സി.സി.ഐ.
ഞായറാഴ്ച നടന്ന ഫൈനലില്‍ ദക്ഷിണാഫ്രിക്കയെ ഒമ്പത് വിക്കറ്റിന് പരാജയപ്പെടുത്തിയാണ് ഇന്ത്യ വിജയ കിരീടം ചൂടിയത്. ടീമിനെ അഭിനന്ദിച്ച് നിരവധിപ്പേരാണ് രംഗത്തെത്തിയത്. വനിതാ ക്രിക്കറ്റിന്റെ വളര്‍ച്ചയുടെ പ്രതിഫലനമാണ് ഈ വിജയമെന്നും ടീമിന് എല്ലാ ആശംസകളും നേരുന്നുവെന്നും ബി.സി.സി.ഐ പ്രസിഡന്റ് റോജര്‍ ബിന്നി പറഞ്ഞു. അഭിമാനകരമായ നേട്ടമാണ് സ്വന്തമാക്കിയതെന്ന് ബി.സി.സി.ഐ വൈസ് പ്രസിഡന്റ് രാജീവ് ശുക്ല പറഞ്ഞു.
ക്വലാലംപുരിലെ ബയൂമാസ് ഓവലിൽ നടന്ന ഫൈനലിൽ, 52 പന്ത് ബാക്കിനിൽക്കേ ഒമ്പതുവിക്കറ്റിനാണ് ഇന്ത്യ വിജയം കണ്ടത്. കർണാടകക്കാരിയായ നിക്കി പ്രസാദ് നയിച്ച ഇന്ത്യൻ ടീമിൽ വയനാട്ടുകാരിയായ ഓൾറൗണ്ടർ വി.ജെ. ജോഷിതയും അംഗമായിരുന്നു. ഒരുമത്സരംപോലും തോൽക്കാതെയാണ് ഇന്ത്യ കിരീടത്തിലെത്തിയത്. 2023-ൽ നടന്ന പ്രഥമ അണ്ടർ 19 വനിതാ ലോകകപ്പിലും ഇന്ത്യയായിരുന്നു ജേതാക്കൾ.
