വിഷ്ണുജിത്തിനെ കാണാതായിട്ട് അഞ്ച് ദിവസം

മലപ്പുറം: ഇന്നലെ വിവാഹിതനാകേണ്ടിയിരുന്ന വിഷ്ണുജിത്തിനെ കാണാതായിട്ട് അഞ്ച് ദിവസമായി. തിരോധാനത്തിൽ ദുരൂഹതയുണ്ടെന്ന് ആരോപിച്ച് ബന്ധുക്കൾ രംഗത്തെത്തിയിരിക്കുകയാണ്. മങ്കട പള്ളിപ്പുറം കുറന്തല വീട്ടിൽ വിഷ്ണുജിത്തിനെയാണ് (30) കാണാതായത്​.

വിവാഹാവശ്യത്തിനുള്ള പണത്തിനായി പാലക്കാട്ടെ സുഹൃത്തിന്‍റെ അടുത്തേക്ക്​ കഴിഞ്ഞ നാലിന്​ രാവിലെ ആറോടെ പോയതാണ്​. ബസിലായിരുന്നു യാത്ര. രാത്രി 8.10നാണ്​ അവസാനമായി വീട്ടുകാരുമായി ഫോണിൽ ബന്ധപ്പെട്ടത്​. തുടർന്ന്​ ഫോൺ സ്വിച്ച്​ ഓഫ്​ ആയി.

ഞായറാഴ്​ചയായിരുന്നു വിഷ്​ണുജിത്തിന്‍റെ വിവാഹം നടക്കേണ്ടിയിരുന്നത്. ഒരു ലക്ഷത്തോളം രൂപ സുഹൃത്തിൽനിന്ന് വാങ്ങി തിരികെ മടങ്ങുമെന്നാണ് വീട്ടുകാരെ ഫോണിൽ അറിയിച്ചത്​. കഞ്ചിക്കോട്​ നിന്നാണ്​ വിഷ്ണുജിത്തിന്‍റെ ഫോൺ സ്വിച്ച്​ ഓഫ്​ ആ​യതെന്ന്​ പൊലീസ്​ കണ്ടെത്തിയിട്ടുണ്ട്​.

രണ്ട് സംഘങ്ങളായി യുവാവിനായി തിരച്ചിൽ ആ​രംഭിച്ചതായി മലപ്പുറം എസ്​.പി എസ്​. ശശിധരൻ അറിയിച്ചു. സി.സി.ടി.വി ദൃശ്യങ്ങളും ഫോണിന്‍റെ കോൾ വിവരങ്ങളും ശേഖരിച്ചുവരുന്നു. കുറച്ചു വിവരങ്ങൾ പൊലീസിന്​ ലഭിച്ചിട്ടുണ്ടെന്നും അധികം വൈകാതെ കണ്ടെത്താനാവുമെന്നാണ്​ പ്രതീക്ഷയെന്നും എസ്​.പി അറിയിച്ചു. തിരോധാനവുമായി ബധപ്പെട്ട്​ മലപ്പുറം പൊലീസാണ്​ കേസ്​ രജിസ്റ്റർ ചെയ്തത്​. പാലക്കാട്​ ഐസ്​ക്രീം കമ്പനിയിലാണ് വിഷ്​ണുജിത്ത് ജോലി ചെയ്യുന്നത്​.