കൊല്ലം: ചേരയെ കൊല്ലുന്നത് വന്യജീവി സംരക്ഷണ നിയമപ്രകാരം മൂന്നുവര്‍ഷം വരെ തടവു ലഭിക്കുന്ന കുറ്റംമെന്ന് വനംവകുപ്പ് . വന്യജീവി നിയമപ്രകാരം പാരിസ്ഥിതിക പ്രാധാന്യം കണക്കിലെടുത്ത് വന്യജീവികളെ നാല് ഷെഡ്യൂളുകളിലായാണ് തിരിച്ചിരിക്കുന്നത്.
ചേര, നീര്‍ക്കോലി തുടങ്ങി മൂര്‍ഖന്‍, അണലി, രാജവെമ്പാല, പെരുമ്പാമ്പ് വരെ എല്ലാഇനം പാമ്പുകളും ഏറ്റവും പ്രാധാന്യമുള്ള ഒന്നാം ഷെഡ്യൂളിലാണ്. ആനയും സിംഹവും കടുവയും കുരങ്ങുമെല്ലാം ഇതോടൊപ്പം ഒന്നാം ഷെഡ്യൂളിലാണ്. ഇവയെ കൊല്ലുന്നത് മൂന്നുവര്‍ഷത്തില്‍ കുറയാതെ, ഏഴുവര്‍ഷം വരെ തടവും 25,000 രൂപ പിഴയും ശിക്ഷ ലഭിക്കാവുന്ന കുറ്റമാണ്.
ചേരയെ കൊന്നതിന്റെ പേരില്‍ ആരെയെങ്കിലും ശിക്ഷിച്ചതായി വനംവകുപ്പ് ഉദ്യോഗസ്ഥര്‍ക്കും ധാരണയില്ല. എന്നാല്‍ കൊല്ലുന്നത് കുറ്റകരമാണെന്ന് അവര്‍ പറയുന്നു. സാധാരണ കാണുന്ന എലികള്‍, വാവല്‍, കാക്ക എന്നിവയെ കൊന്നാല്‍ ശിക്ഷയില്ല. എന്നാല്‍ ചിലയിനം എലികളും വാവലുകളും ആക്ടിന്റെ പരിഥിയില്‍പ്പെടുന്നുണ്ട്. കാട്ടുപന്നിയടക്കമുള്ളവ രണ്ടാം ഷെഡ്യൂളിലാണ്. നീലക്കാള(മാന്‍ വര്‍ഗത്തില്‍ പെട്ട മൃഗം) പുള്ളിമാന്‍, ചിലയിനം പക്ഷികള്‍ തുടങ്ങിയവയും ഈ ഷെഡ്യൂളിലുണ്ട്. നാട്ടിലിറങ്ങി ശല്യമുണ്ടാക്കുന്ന കാട്ടുപന്നിയെ ഇപ്പോള്‍ വെടിവെക്കാന്‍ അനുമതിയുണ്ടെങ്കിലും ഈ ഷെഡ്യൂളിലെ മറ്റുമൃഗങ്ങളെ കൊന്നാല്‍ മൂന്നുവര്‍ഷംവരെ തടവോ 25,000 രൂപ പിഴയോ രണ്ടുംകൂടിയോ ശിക്ഷ ലഭിക്കാം.
തേനീച്ച, കടന്നല്‍ എന്നിവയെ സംസ്ഥാന സര്‍ക്കാര്‍ 2024-ല്‍ വന്യജീവികളുടെ കൂട്ടത്തില്‍പ്പെടുത്തിയെങ്കിലും ഇവയെ വന്യജീവി സംരക്ഷണനിയമത്തില്‍ ഉള്‍പ്പെടുത്തിയിട്ടില്ല. അതുകൊണ്ടുതന്നെ ഇവയെ നീക്കംചെയ്യേണ്ട ചുമതല വനംവകുപ്പിനില്ല. ഈ ജീവികളുടെ കുത്തേറ്റ് മരണം സംഭവിച്ചാല്‍ നഷ്ടപരിഹാരം നല്‍കുന്ന നടപടികള്‍ ലഘൂകരിക്കാന്‍ വേണ്ടിയാണ് ഇവയെ വന്യജീവിപ്പട്ടികയിലാക്കിയിരിക്കുന്നത്.
