കൊച്ചി: കെഎസ്ആര്‍ടിസി ബസ് താഴ്ചയിലേക്ക് മറിഞ്ഞ് അപകടം. എറണാകുളത്തേക്ക് പോകുന്ന ബസ് നേര്യമംഗലം മണിയാമ്പാറയില്‍ വെച്ച് പതിനൊന്ന് മണിയോടുകൂടിയാണ് അപകടത്തില്‍ പെടുന്നത്. മറിഞ്ഞ ബസിനടിയില്‍ കുടുങ്ങിയ കുട്ടിയെ പുറത്തെത്തിച്ചെങ്കിലും ജീവന്‍ രക്ഷിക്കാനായില്ല.
കോതമംഗലത്തെ ആശുപത്രിയിലേക്കാണ് കുട്ടിയെ കൊണ്ടുപോയത്. നിയന്ത്രണം വിട്ട് മറിഞ്ഞതോടെ ബസിനകത്തുണ്ടായിരുന്ന കുട്ടി തെറിച്ച് പുറത്തേക്ക് വീഴുകയും ദേഹത്തേക്ക് ബസ് പതിക്കുകയുമായിരുന്നു എന്നാണ് വിവരം. ബസ് ഫയര്‍ഫോഴ്‌സും പൊലീസും സ്ഥലത്തെത്തി ക്രെയിന്‍ ഉപയോഗിച്ച് ഉയര്‍ത്തിയ ശേഷമാണ് കുട്ടിയെ പുറത്തെടുത്തത്. ബസിലുണ്ടായിരുന്ന യാത്രക്കാരില്‍ പരുക്കേറ്റവരെ കോതമംഗലം മാര്‍ ബസോലിയസ് ആശുപത്രിയിലും കോതമംഗലം താലൂക്ക് ആശുപത്രിയിലും പ്രവേശിപ്പിച്ചു.
