പാലക്കാട് : പാലക്കാട് ചരിത്രഭൂരിപക്ഷത്തോടെ മിന്നും വിജയം സ്വന്തമാക്കി രാഹുല്‍ മാങ്കൂട്ടത്തില്‍. പാലക്കാടിനെ ത്രില്ലടിപ്പിച്ച് ഷാഫിക്ക് പിന്‍ഗാമിയായി ഇനി കോണ്‍ഗ്രസിന്റെ പ്രിയപ്പെട്ട രാഹുല്‍ മാങ്കൂട്ടത്തില്‍. 18724 വോട്ടിന്റെ ഭൂരിപക്ഷത്തിലാണ് രാഹുല്‍ പാലക്കാട് യുഡിഎഫിന്റെ വിജയക്കൊടിപാറിച്ചിരിക്കുന്നത്.
വരത്തെനെന്ന വിളിപ്പേരില്‍ തുടങ്ങിയ പോരാട്ടം ഇന്ന് അതിശയകരമായ വിജയത്തിളക്കത്തില്‍ എത്തി നില്‍ക്കുകയാണ്. ചോദ്യമെന്തായാലും കൃത്യമായ ഉത്തരത്തിലൂടെ രാഹുല്‍ പാലക്കാടിലെ ജനങ്ങളുടെ മനസ്സില്‍ ചേക്കേറിയതിന്റെ ഉത്തമ ഉദാഹരണമാണ് വമ്പിച്ച ഈ ഭൂരിപക്ഷം. 58,389 വോട്ടുകളാണ് രാഹുല്‍ നേടിയത്.
തന്റെ രാഷ്ട്രീയ ജീവിതത്തിലെ ആദ്യ നിയമസഭാ തെരഞ്ഞെടുപ്പ്. ഇടതിനെ കുത്തിയിളക്കി, താമര തണ്ടിനെ ഒടിച്ച് യുവപോരാളിയായിരിക്കുന്നു രാഹുല്‍ മാങ്കൂട്ടത്തില്‍. രാഹുലിന്റെ രാഷ്ട്രീയ ഭാവി തന്നെ ശോഭനമായിരിക്കുകയാണ് ഈ തെരഞ്ഞെടുപ്പിലൂടെ. ബിജെപിയുടെ തട്ടകത്തില്‍, അതും കന്നിയങ്കത്തില്‍ മുന്‍ഗാമിയായ ഷാഫിയേക്കാല്‍ മൂന്നിരട്ടിയോളം ഭൂരിപക്ഷത്തില്‍ രാഹുല്‍ തലയുയര്‍ത്തുമ്പോള്‍ ആ വിജയത്തിന്റെ തിളക്കത്തിന് എടുപ്പൊരല്‍പം കൂടുതല്‍ തന്നെയാണ്.
