സംസ്ഥാനത്ത് നാളെ മുതൽ മദ്യത്തിന് വില കൂടും . 62 കമ്പനികളുടെ 341 ബ്രാൻഡുകൾക്ക് വില കൂടും.10 രൂപ മുതൽ 50 രൂപ വരെയാണ് വില വർധിക്കുക.പുതുക്കിയ മദ്യ വില വിവര പട്ടികയും ബെവ്കോ പുറത്തിറക്കി. ബവ്കോയും മദ്യക്കമ്പനികളും തമ്മിലുള്ള ‘റേറ്റ് കോൺട്രാക്ട്’ അനുസരിച്ചാണു മദ്യവില നിശ്ചയിക്കുന്നത്. സർക്കാർ മദ്യമായ ജവാന് 10 രൂപയാണ് കൂട്ടിയത്. 640 രൂപയുടെ മദ്യത്തിനു ഇനി 650 രൂപ നൽകണം.
ഓൾഡ് പോർട് റമ്മിൻ്റെ വില 30 രൂപ കൂടി. 750 രൂപയായിരുന്ന മദ്യത്തിന് ഇനി മുതൽ 780 രൂപയാണ്.ചില ബ്രാൻഡുകൾക്ക് മാത്രമാണ് വില കൂടുന്നത്. അതേസമയം ചില ബ്രാൻഡുകളുടെ വില കുറയ്ക്കാനും തീരുമാനമുണ്ട്. . സ്പിരിറ്റ് വില വർധിച്ചതിനാൽ മദ്യവില കൂട്ടണമെന്ന മദ്യ നിര്‍മാണ കമ്പനികളുടെ ആവശ്യം പരിഗണിച്ചാണ് തീരുമാനം. സംസ്ഥാനത്ത് 15 മാസത്തിന് ശേഷമാണ് മദ്യത്തിൻ്റെ വില വർധിപ്പിച്ച് കൊണ്ടുള്ള തീരുമാനം വരുന്നത്.
