മുംബൈ: ഫുട്‌ബോള്‍ പ്രേമികള്‍ക്ക് ആവേശമായി ഐ എസ് എല്‍ പതിനൊന്നാം സീസണ് നാളെ തുടക്കമാകും. ഈ സീസണില്‍ കിരീടം ലക്ഷ്യമിട്ട് പൊരുതുന്നത് 13 ടീമുകളാണ്. കൊല്‍ക്കത്തയില്‍ വൈകിട്ട് ഏഴരയ്ക്കാണ് മത്സരം തുടങ്ങുക. കൊല്‍ക്കത്തന്‍ ക്ലബ് മുഹമ്മദന്‍ സ്‌പോര്‍ട്ടിംഗാണ് നവാഗതര്‍. ഇവാന്‍ വുകോമനോവിച്ചിന്റെ പകരക്കാരന്‍ മൈക്കല്‍ സ്റ്റാറേയിലും പുതിയ താരങ്ങളിലും ബ്ലാസ്റ്റേഴ്‌സ് ആരാധകര്‍ക്ക് പ്രതീക്ഷയേറെ.
ഉദ്ഘാടന മത്സരത്തില്‍ മുംബൈ സിറ്റി എഫ് സി, മോഹന്‍ ബഗാനെ നേരിടും. കഴിഞ്ഞ സീസണിലെ ഫൈനലിന്റെ ആവര്‍ത്തനമാണ് ഇത്തവണത്തെ ഉദ്ഘാടന മത്സരം. ഈ സീസണില്‍ ലീംഗ് നിയമങ്ങളിലും മാറ്റമുണ്ട്. എല്ലാ ടീമിനും ഇന്ത്യക്കാരനായ സഹപരിശീലകന്‍ നിര്‍ബന്ധം. കണ്‍കഷന്‍ സബ്സ്റ്റിറ്റിയൂട്ടിനൊപ്പം റഫറി തെറ്റായി ചുവപ്പ് കാര്‍ഡ് നല്‍കിയതിനെതിരെ അപ്പീല്‍ നല്‍കാനും അവസരമുണ്ട്.
