രാജ്കോട്ട്: 8,000 കിലോഗ്രാം സവാള മോഷ്ടിച്ച മൂന്ന് പേര്‍ അറസ്റ്റില്‍. മൂന്ന് ലക്ഷം രൂപ വിലവരുന്ന സവാളയാണ് മൂന്നംഗ സംഘം മോഷ്ടിച്ചത്. 33 വയസുള്ള കര്‍ഷകന്‍ സാബിര്‍ഹുസൈന്‍ ഷെര്‍സിയ, 30 കാരനായ വ്യാപാരി ജാബിര്‍ ബാദി, 45 കാരനായ ഡ്രൈവറും കര്‍ഷകനുമായ നസ്‌റുദ്ദീന്‍ ബാദി എന്നിവരാണ് സവാള മോഷണം നടത്തിയത്. വാങ്കനീര്‍ സിറ്റി പൊലീസ് ഇവരെ അറസ്റ്റ് ചെയ്തു.
മോഷ്ടിച്ച സവാള വില്‍ക്കാന്‍ വാങ്കനീര്‍ ഭാഗത്തേക്ക് പോകുകയായിരുന്ന പ്രതികളെ വാങ്കനീര്‍ അമര്‍സര്‍ ക്രോസിന് സമീപം വെച്ച് പിടികൂടുകയായിരുന്നു. രഹസ്യവിവരത്തെത്തുടര്‍ന്നാണ് പൊലീസ് പരിശോധന നടത്തിയത്. പ്രതികളില്‍ നിന്ന് 3.11 ലക്ഷം രൂപയും 1600 രൂപ വിലവരുന്ന 40 കിലോ സവാളയും മൂന്ന് ലക്ഷം രൂപ വിലവരുന്ന ട്രക്കും പൊലീസ് പിടിച്ചെടുത്തു. ചോദ്യം ചെയ്യലില്‍, സവാള മോഷ്ടിച്ചതായും വിറ്റതായും പ്രതികള്‍ കുറ്റസമ്മതം നടത്തി.
