തിരുവനന്തപുരം: കെ.സി.എലിൽ ചൊവ്വാഴ്ച രണ്ടാം മത്സരത്തിൽ ട്രിവാൻഡ്രം റോയൽസിനെ ആലപ്പുഴ റിപ്പിൾസ് 33 റൺസിന് കീഴടക്കി. സ്കോർ ആലപ്പുഴ 20 ഓവറിൽ എട്ടിന് 145. ട്രിവാൻഡ്രം റോയൽസ് 18.1 ഓവറിൽ 112.ടോസ് നേടിയ ട്രിവാൻഡ്രം ഫീൽഡിങ് തിരഞ്ഞെടുത്തു. ആലപ്പുഴയുടെ ഓപ്പണർമാരായ മുഹമ്മദ് അസ്ഹറുദ്ദീനും (28) കൃഷ്ണപ്രസാദും (23) ചേർന്ന് ആദ്യവിക്കറ്റിൽ 51 റൺസ് നേടി.
പിന്നീട് തുടർച്ചയായി വിക്കറ്റുവീണതോടെ അഞ്ചിന് 107 എന്നനിലയിൽ തകർന്നു. മധ്യനിരബാറ്റർമാരുടെ ചെറുത്തുനിൽപ്പിലൂടെ 145-ലെത്തി.മറുപടിബാറ്റിങ്ങിൽ ട്രിവാൻഡ്രം റോയൽസിന്റെ തുടക്കം വൻ തകർച്ചയോടെയായിരുന്നു. വിഷ്ണുരാജ്, രോഹൻ പ്രേം, ജോഫിൻ ജോസ് എന്നിവർ പൂജ്യത്തിന് പുറത്തായി. മൂന്നുവിക്കറ്റിന് ഒരു റൺ. സ്കോർ 14-ൽനിൽക്കെ നാലാം വിക്കറ്റും വീണു. അഞ്ചിന് 19 എന്നനിലയിൽനിൽക്കെ, ക്യാപ്റ്റൻ അബ്ദുൾ ബാസിത് (31 ബോളിൽ 45), അഖിൽ എം.എസ്. (36 ബോളിൽ 38) എന്നിവരുടെ ചെറുത്തുനിൽപ്പാണ് വമ്പൻ പരാജയത്തിൽനിന്ന് രക്ഷിച്ചത്. ആലപ്പുഴയുടെ ഫായിസ് ഫനൂസും ആനന്ദ് ജോസഫും നാലുവിക്കറ്റുവീതം നേടി.
