ബെംഗളൂരു: ഇന്ത്യൻ ക്രിക്കറ്റ് താരം വിരാട് കോലിയും ലോക പ്രശസ്ത ബ്രാൻഡായ പ്യൂമയുമായുള്ള കരാര്‍ അവസാനിച്ചു. നീണ്ട എട്ട് വർഷത്തിന് ശേഷമാണ് കരാർ അവസാനിച്ചത് .2017 മുതലാണ് കോലിയും പ്യൂമയുമായുള്ള കരാര്‍ ആരംഭിച്ചത്. ജര്‍മ്മന്‍ സ്പോര്‍ട്‌സ്‌വെയര്‍ ബ്രാന്‍ഡായ പ്യൂമയായിരുന്നു ഇന്ത്യന്‍ ക്രിക്കറ്റ് ഇതിഹാസം വിരാട് കോലിയുടെ എട്ട് വർഷത്തെ സ്പോണ്‍സര്‍മാര്‍. 110 കോടി രൂപയുടെ പരസ്യ കരാറായിരുന്നു കോലിയും പ്യൂമയും തമ്മിലുണ്ടായിരുന്നത്.
നിലവിൽ ഐപിഎല്‍ പതിനെട്ടാം സീസണില്‍ റോയല്‍ ചലഞ്ചേഴ്സ് ബെംഗളൂരുവിനായി കളിച്ചുകൊണ്ടിരിക്കുകയാണ് വിരാട് കോലി. ഇനി മുതൽ അജിലിറ്റാസായിരിക്കും കോലിയുടെ പുതിയ സ്പോണ്‍സര്‍മാര്‍ എന്ന റിപ്പോർട്ടുകളാണ് പുറത്ത് വരുന്നത്. ഈ സീസണിൽ തന്നെ കോലിയും അജിലിറ്റാസും തമ്മിലുള്ള കരാര്‍ പ്രഖ്യാപനമുണ്ടായേക്കും എന്നാണ് ലഭിക്കുന്ന വിവരം .
