ഇടുക്കി: മൂന്നാറില്‍ പരിക്കേറ്റ കാട്ടാനയ്ക്ക് ചികിത്സ നല്‍കണമെന്ന് ആവശ്യപ്പെട്ട് മൃഗസ്നേഹികളുടെ സംഘടന ഹൈക്കോടതിയെ സമീപിച്ചു.
വാക്കിംഗ് ഫൗണ്ടേഷന്‍ ഫോര്‍ ആനിമല്‍ അഡ്വക്കസി എന്ന സംഘടനയാണ് പരാതിയുമായി ഹൈക്കോടതിയെ സമീപിച്ചത്. കേസ് പത്താം തീയതി കോടതി പരിഗണിക്കും.
ഒരു മാസം മുമ്പാണ് ഒറ്റക്കൊമ്പന് എന്ന് വിളിക്കുന്ന കാട്ടാനയും പടയപ്പ എന്ന് വിളിക്കുന്ന കാട്ടാനയും തമ്മില്‍ ഏറ്റുമുട്ടിയത്. മൂന്നാറിന് സമീപം കല്ലാറിലെ മാലിന്യ പ്ലാന്റില്‍ വെച്ചായിരുന്നു ഏറ്റുമുട്ടല്‍. ഏറ്റുമുട്ടലില്‍ ഒറ്റക്കൊമ്പന് വലത് മുന്‍ കാലിന്റെ മുട്ടിനു മുകളില്‍ ഗുരുതരമായി പരിക്കേറ്റിരുന്നു. ആനയെ വിശദമായി നിരീക്ഷിക്കുന്നതിന് വെറ്റിനറി ഡോക്ടര്‍മാരുടെ സംഘം നാളെ മൂന്നാറില്‍ എത്തും.
