കേരള സെക്ടറില്‍ 1000 4ജി ടവറുകള്‍ പൂര്‍ത്തിയാക്കി പൊതുമേഖല ടെലികോം കമ്പനിയായ ബിഎസ്എന്‍എല്‍. തദ്ദേശീയമായി വികസിപ്പിച്ച 4ജി ടെക്നോളജിയുടെ കരുത്തിലാണ് ബിഎസ്എന്‍എല്ലിന്റെ 4ജി വിന്യാസം. ടെലികോം മന്ത്രാലയം ഔദ്യോഗിക എക്സ് ഹാന്‍ഡിലിലൂടെ അറിയിച്ചു. ആഘോഷത്തിന്റെ ഭാഗമായുള്ള കേക്ക് സഹിതമാണ് ടെലികോം മന്ത്രാലയത്തിന്റെ ട്വീറ്റ്. രാജ്യവ്യാപകമായി ബിഎസ്എന്‍എല്ലിന്റെ 4ജി വ്യാപനം പുരോഗമിക്കുകയാണ്.
ഒരു ലക്ഷം 4ജി സൈറ്റുകളാണ് ലക്ഷ്യമെന്ന് ബിഎസ്എന്‍എല്‍ നേരത്തെ വ്യക്തമാക്കിയിരുന്നു. ഇതിനിടെയാണ് കേരളത്തില്‍ ആയിരം 4ജി സൈറ്റുകള്‍ സാധ്യമാക്കാന്‍ ബിഎസ്എന്‍എല്ലന് സാധിച്ചത്. വിവിധ നഗരങ്ങള്‍ക്ക് പുറമെ പല ജില്ലകളിലും ഗ്രാമ, ഉള്‍നാടന്‍ പ്രദേശങ്ങളിലും ബിഎസ്എന്‍എല്‍ 4ജി നെറ്റ് വര്‍ക്ക് എത്തിയിട്ടുണ്ട്. ഇന്റര്‍നെറ്റ് വേഗക്കുറവിനെ കുറിച്ചുള്ള ഉപഭോക്താക്കളുടെ പരാതി കുറയ്ക്കാന്‍ ഇതുവഴി സാധിക്കും എന്നാണ് പ്രതീക്ഷ. സ്വകാര്യ ടെലികോം കമ്പനികള്‍ താരിഫ് നിരക്കുകള്‍ വര്‍ധിപ്പിച്ചതിന് പിന്നാലെ കേരളത്തിലും ബിഎസ്എന്‍എല്ലിലേക്ക് കൂടുതല്‍ ഉപഭോക്താക്കള്‍ പുതുതായി എത്തിയിരുന്നു.
