ബഹിരാകാശ യാത്ര നടത്തിയ ആദ്യ അറബ് വനിത എന്ന ഗിന്നസ് വേള്‍ഡ് റെക്കോര്‍ഡ് സ്വന്തമാക്കി റയാന ബര്‍നാവി. 2023 മെയ് 21-നാണ് യു.എസിലെ ഫ്‌ലോറിഡ കെന്നഡി ബഹിരാകാശ കേന്ദ്രത്തില്‍ നിന്നും സൗദി ബഹിരാകാശ സഞ്ചാരി അലി അല്‍ഖര്‍നിക്കൊപ്പം റയാന ബര്‍നാവി അന്താരാഷ്ട്ര ബഹിരാകാശ നിലയത്തിലേക്ക് യാത്ര നടത്തിയത്. ബയോമെഡിക്കല്‍ സയന്‍സസിലെ ഗവേഷകയാണ് 34 കാരിയായ റയാന ബര്‍നാവി.
എട്ട് ദിവസം നീണ്ടുനിന്ന ബഹിരാകാശയാത്രാ ദൗത്യത്തിനിടെ രോഗപ്രതിരോധ കോശങ്ങളുടെ പ്രതികരണവും ജൈവപ്രക്രിയകളില്‍ മൈക്രോ ഗ്രാവിറ്റിയുടെ സ്വാധീനവും പഠിക്കുന്നത് ഉള്‍പ്പെടെ നിരവധി ശാസ്ത്രീയ പരീക്ഷണങ്ങള്‍ ബര്‍നാവി നടത്തി. ഈ പരീക്ഷണങ്ങള്‍ ആഗോളതലത്തില്‍ സൗദിയുടെ ശാസ്ത്രീയ പങ്ക് വര്‍ധിപ്പിക്കുന്നതിന് സംഭാവന നല്‍കി. മനുഷ്യരാശിയെ സേവിക്കുന്ന ശാസ്ത്ര കണ്ടെത്തലുകളുടെ ഒരു പുതിയ ഘട്ടം അറിയിച്ചു.
