മലപ്പുറം: ഫുട്ബോൾ കളിക്കിടെ പടക്കം കാണികൾക്കിടയിൽ വീണ് പൊട്ടി 22 പേർക്ക് പരുക്കേറ്റു. അപകടത്തിൽ ആരുടെയും പരുക്ക് ഗുരുതരമല്ലെന്നാണ് വിവരം. മലപ്പുറം അരീക്കോട് തെരട്ടമ്മലിയിലാണ് സംഭവം. ഉയരത്തിൽ വിട്ട പടക്കം കാണികൾക്കിടയിൽ വീണ് പൊട്ടുകയായിരുന്നു എന്നാണ് പുറത്ത് വരുന്ന വിവരം. പരുക്കേറ്റവരെ ഉടൻ തന്നെ ആശുപത്രിയിലേക്ക് മാറ്റി.
ഇന്ന് ടൂർണമെൻ്റിൻ്റെ ഫൈനൽ മത്സരമായിരുന്നതിനാൽ, ഇതിന് മുന്നോടിയായി കരിമരുന്ന് പ്രയോഗമുണ്ടായിരുന്നു. ഇതിൻ്റെ ഭാഗമായി പൊട്ടിച്ച പടക്കമാണ് ദിശ മാറി കാണികൾക്ക് ഇടയിൽ വീണ് പൊട്ടിയത്. മൂന്ന് പേർക്കാണ് പടക്കത്തിൻ്റെ തീപ്പൊരി ചിതറി വീണ് പൊള്ളലേറ്റത്. പരിഭ്രാന്തരായ കാണികൾ ചിതറി ഓടിയതോടെ ഇതിൽ പലരും വീണു. തുടർന്ന് 19 പേർക്കും പരുക്കേറ്റു. ഇവരെയെല്ലാം അരീക്കോട്ടെ സ്വകാര്യ ആശുപത്രിയിലേക്ക് മാറ്റിയ ശേഷം സ്ഥലത്ത് മത്സരം പുനരാരംഭിക്കുകയായിരുന്നു.
