മധുര: കേരളത്തില്‍നിന്ന് പുതുതായി മൂന്നുപേര്‍ സിപിഎം കേന്ദ്രകമ്മിറ്റി യിലേക്ക്. ടിപി രാമകൃഷ്ണന്‍, ദിനേഷ് പുത്തലത്ത്, കെ.എസ്. സലീഖ എന്നിവരാണ് കേന്ദ്ര കമ്മിറ്റിയിലെത്തുന്ന മൂന്നുപേര്‍. വനിതാ പ്രാതിനിധ്യം പരിഗണിച്ചാണ് കെ. സലീഖയെ കേന്ദ്ര കമ്മിറ്റിയിലേക്ക് പരിഗണിച്ചതെന്നാണ് വിവരം.
എകെജി സെന്റര്‍ നോമിനിയായാണ് ദിനേഷ് പുത്തലത്ത് കേന്ദ്ര കമ്മിറ്റിയിലേക്ക് എത്തുന്നത്. നിലവില്‍ സംസ്ഥാ സെക്രട്ടേറിയറ്റ് അംഗവും ദേശാഭിമാനി ചീഫ് എഡിറ്ററുമാണ്.
പിബിയില്‍നിന്ന് ഇത്തവണ ഒഴിവാകുന്ന മണിക് സര്‍ക്കാര്‍, പ്രകാശ് കാരാട്ട്, വൃന്ദാ കാരാട്ട്, സുഭാഷിണി അലി, എസ്. രാമചന്ദ്രന്‍ പിള്ള, ബിമന്‍ ബസു, ഹനന്‍ മൊള്ള എന്നിവര്‍ കേന്ദ്രകമ്മിറ്റിയില്‍ പ്രത്യേക ക്ഷണിതാവായി തുടരും.
ഇത്തവണ പി.കെ. ശ്രീമതി, തിരിഗാമി എന്നിവര്‍ക്കു മാത്രമാണ് കേന്ദ്ര കമ്മിറ്റിയില്‍ ഇളവ് നല്‍കിയിരിക്കുന്നത്. എസ്.ആര്‍.പി., ഹനന്‍ മൊള്ള, ബിമന്‍ ബസു എന്നിവര്‍ കഴിഞ്ഞതവണ പ്രായപരിധി മാനദണ്ഡത്തിന്റെ പേരില്‍ പുറത്തായവരാണ്. ഇവര്‍ ഇത്തവണയും ക്ഷണിതാക്കളാണ്.
85 അംഗ കേന്ദ്ര കമ്മിറ്റിയില്‍ 15 വനിതകളാണുള്ളത്. ഇതിന് പുറമെ ഏഴുപേര്‍ പ്രത്യേക ക്ഷണിതാക്കളാണ്. കശ്മീരിലെ സാഹചര്യം പരിഗണിച്ചാണ് തരിഗാമിക്ക് ഇളവ് നല്‍കിയത്. മഹിളാ അസോസിയേഷന്‍ ദേശീയ പ്രസിഡന്റ് എന്നത് പരിഗണിച്ചാണ് പി.കെ. ശ്രീമതിയ്ക്ക് ഇളവ് നല്‍കിയത്.
